1 მაისის შეჯამება უკრაინაში:
– რუსეთში, კურსკის რაიონში, უკრაინისაკენ მიმავალი რკინიგზის ხაზები და ორი ხიდი აფეთქებულია. რუსული ლოჯისტიკა კურსკი-ბელგოროდის გავლინ ხარკივის რაიონში აგზავნიდა ტვირთებს. ბოლო ერთ კვირაში როგორც ბელგოროდის რაიონში, ისე კურსკის რაიონში რკინიგზის კვანძები განადგურებულია. მათ აღდგენას დრო უნდა.
– ხარკივის რაიონში უკრაინელებმა მასშტაბული საარტილერიო იერიში წამოიწყეს მდინარე სევერსკი დონეცზე მდებარე ქალაქ სტარი სალტივთან მყოფი რუსული სამხედრო ძალების წინააღმდეგ. აღნიშნული შეტევა მოწინააღმდეგის განადგურებას და შემდგომ, უფრო მასშტაბური გაჭრისათვის მომზადების წინაპირობა შეიძლება გახდეს. რუსებმა დიდი რაოდენობით ცოცხალი ძალა დაკარგეს.
ზოგადად, მდინარე სევერსკი დონეცი ხარკივის ჩრდილო-აღმოსავლეთით მდებარეობს. ქალაქი სტარი სალტის დაკავების შემთხვევაში კი უკრაინელები ძალიან მიუახლოვდებიან რუსული მომარაგების ერთ-ერთ არტერიას და ჩაკეტავენ მას.
ამასთან, უკრაინელები ხარკივის შემოგარენის გაწმენდის საბოლოო ეტაპზე იმყოფებიან და სწორედ სტარი სალტივის გათავისუფლების შემთხვევაში რუსებს არცერთი საშუალო სიდიდის ქალაქი აღარ ეჭირებათ სევერსკი დონეცის დასავლეთ სანაპიროზე, ხოლო ქალაქ ხარკივთან მიახლოება შეუძლებელი გახდება.
თავად ქალაქ ხარკივსა და მის შემოგარენში გათავისუფლებულ სოფლებში უკრაინელებმა დიდი რაოდენობით ჰუმანიტარული ტვირთი შეიტანეს. მოსახლეობა გარდა იმისა, რომ სიხარულით შეხვდა უკრაინელ გამათავისუფლებლებს, ისინი საშინელ ამბებსაც ჰყვებიან თუ რა ხდებოდა რუსული ოკუპაციის პერიოდში.
– გუშინ შეჯამებისას ვყვებოდი თუ ორი დღის წინ როგორ გაანადგურეს რუსების სამეთაურო პუნქტი იზუმთან. როგორც ჩანს იქ არამხოლოდ მიმართულების ხელმძღვანელი გენერალი სიმონოვი შეიძლება ყოფილიყო, არამედ უფრო გავლენიანი პირებიც კი. წყაროები იტყობინებიან ვალერი გერასიმოვის – რუსეთის გენშტაბის უფროსის – დაჭრაზეც კი.
რთულია ამის დადასტურება, მაგრამ იზიუმის მიმართულება ბოლო ორი დღეა (შეტევის შემდეგ) რომ აშკარად გაჩერებულია და ეს იმის ინდიკატორია, რომ მაღალი რანგის ოფიცრები ჯერაც ვერ გარკვეულან შექმნილ რეალობაში. რაც და ვინც არ უნდა ყოფილიყო იმ სამეთაურო პუნქტში, ფაქტია, რომ ამ მიმართულებით რუსებმა მაღალი რანგის ოფიცრობა დაკარგეს, შეტევა კი თითქმის სრულადაა გაჩერებული.
– დღეს აზოვსტალიდან მშვიდობიანი მოსახლეობის ევაკუაცია დაიწყო. საუბარია 100 მოქალაქეზე. ისინი ზაპორიჟიაში ჩავლენ. გაეროს მისიის ზედამხედველობით ამ პროცესს შეუძლია კარგი შედეგი მოჰყვეს, რადგან უკრაინელ მცველთათვის ყველაზე დიდი სირთულე სწორედ საკუთარი მოქალაქეების ბუნკერქვეშა დაცვა გახლდათ.
– რუსებმა დღეს ხერსონის ჩრდილოეთით, კრივიი რიჰის (კრივოი როგი) მიმართულებით გაჭრა სცადეს, თუმცა შეტევა კვლავ მოგერიებულ იქნა. უცნაურია, რომ რუსები არ კარგავენ იმის იმედს, რომ შეძლებენ ოდესის, მიკოლაივისა და კრივიი რიჰის აღებას. ამ მიმართულებით შესაძლოა უკრაინელთა შემტევი ნაწილები ელიტარული არ იყოს, მაგრამ მცველები საუკეთესონი არიან.
ზოგადად კრივიი რიჰი ზელენსკის მშობლიური ქალაქია და კრემლში მისკენ რაიმე ოპერაციის წამოწყებას უფრო სიმბოლურ მნიშვნელობას ანიჭებენ, ვიდრე სამხედრო-სტრატეგიულს, თუმცა დნიპროს რაიონში მსგავსი ოპერაციის წარმატების შანსი თითქმის არარსებულია.
– დონეცკის მიმართულებით უკრაინულმა არტილერიამ რუსების ჯავშანტექნიკის დიდი თავმოყრა გაანადგურა. სამიზნეს დრონები უსწორებდნენ. საუბარია მინიმუმ ექვსი ტანკის განადგურებაზე. ამ ომმა, რიგ შემთხვევაში ტანკების მნიშვნელობა შეამცირა (სრულად არ გამქრალა). მაგრამ რუსების ზარალი დონეცკის რაიონში მხოლოდ იმის მანიშნებელია, რომ ფრონტისპირა გარღვევის შანსები ყოველდღიურად უმცირდებათ.
ზოგადად, რუსების მეორე ფაზა დიდწილად ჩავარდა.
– აშშ-ს წარმომადგენელთა პალატის სპიკერი ნენსი პელოსი კიევში მატარებლით ჩავიდა და პრეზიდენტ ზელენსკის შეხვდა. აშშ-ს ყველა ინსტიტუცია მხარს უჭერს უკრაინას. პრაქტიკულად საზოგადოებრივი თუ პოლიტიკური აზრი კონსოლიდირებულია უკრაინის დასახმარებლად და რუსეთის დასამარცხებლად. ეს კი ომის ბედს ნათელს ხდის.-გიორგი კობერიძე
