2022 წლის იანვარ-თებერვლში საქართველოდან მანქანების რეექსპორტის მონაცემებში, უკრაინა მესამე ადგილს იკავებს 6.8 მლნ აშშ დოლარის (1,101 ერთეული) გაყიდული მსუბუქი ავტომობილებით.
ავტო-იმპორტიორთა ასოციაციის ხელმძღვანელი ლაშა დარბაისელი ,,ბიზნესპრესნიუსთან“ აცხადებს, რომ შემოსავლებისა და რეექსპორტის შემცირება გარდაუვალია. თუმცა, ხელისუფლებისა და კერძო სექტორის ერთობლივი, პროაქტიური მუშაობაა საჭირო, რათა ბაზრის კლების ტემპი მაქსიმალურად შემცირდეს.
„უკრაინა, ჩვენთვის ძალიან მნიშვნელოვანი სავაჭრო პარტნიორი იყო, რომელიც გასაგებია, რომ დავკარგეთ რაღაც დროით. არა ამ მასშტაბის, თუმცა გარკვეული პოზიცია ჰქონდა რუსეთის ბაზარზე ავტომობილების ექსპორტსაც, მაგრამ ეს მაინც ყოველთვის არასტაბილური და პოლიტიკურ განწყობებზე მიბმულია. მოგეხსენებათ, რუსეთში ყველაფერს პოლიტიკური კონტექსტი განსაზღვრავს.
ქართველმა ავტო-იმპორტიორებმა ყველაზე დიდი ზარალი მივიღეთ 2019 წელს, როცა დავკარგეთ სომხეთის ბაზარი. ამის შემდეგ იმედებს ვამყარებდით ყაზახეთზე, სადაც საკმაოდ მზარდი იყო ბაზრის ინტერესი და აქტივობა, მაგრამ მოგეხსენებათ, გასული წლის ბოლოს პოლიტიკურმა არასტაბილურობამ და კრიზისმა ზრდა დააპაუზა. ამის შედეგ, მიზნად დავისახეთ უკრაინის ბაზრის უფრო მეტად ათვისება, მაგრამ რუსეთის შეჭრამ არა მხოლოდ ჩვენი გეგმები, მსოფლიო წესრიგი დააყენა თავდაყირა. ჩვენი სექტორი ისევ გამოწვევების წინაშეა და მნიშვნელოვანია გადავდგათ ნაბიჯები უფრო მეტად შუა აზიის ქვეყნებთან. საჭიროა პარტნიორების მოძიება. სახელმწიფო სტრუქტურების მაქსიმალური ჩართულობა და მუშაობაა საჭირო, რომ განვავითაროთ რეექსპორტი.
ჯერ რთულია, მოსალოდნელი სამიზნე მაჩვენებელი რამდენით შემცირდება, მაგრამ ახლა სწორედ ამისთვის გვჭირდება პროაქტიური მუშაობა, რომ კლების ტემპი მაქსიმალურად შემცირდეს. დიდ მოგებებზე რომ ვერ გავალთ, ისედაც გასაგებია კონტექსტის გათვალისწინებით “ – განაცხადა ლაშა დარბაისელმა ,,ბიზნესპრესნიუსთან“.
შეგახსენებთ, 2022 წლის იანვარ-თებერვალში საქართველოდან 72.6 მილიონი დოლარის ღირებულების მსუბუქი ავტომობილების რეექსპორტი განხორციელდა. გასული წლის ანალოგიურ პერიოდში კი ექსპორტზე 49.9 მილიონი აშშ დოლარის ავტომობილი გავიდა. ზრდამ 45,5% შეადგინა.
Bpn.ge