2026 წლის მე-2 კვარტალში, გასული წლის შესაბამის პერიოდთან შედარებით, ბიზნეს სექტორის ბრუნვის მოცულობა 11.9%-ით გაიზარდა და 67.5 მლრდ. ლარი შეადგინა. ამის შესახებ ინფორმაციას სტატისტიკის ეროვნული სამსახური აქვეყნებს.
მათივე ცნობით, ზრდის ტენდენციით ხასიათდებოდა ბიზნეს სექტორის პროდუქციის გამოშვების მაჩვენებელიც.
კერძოდ, 2026 წლის მე-2 კვარტალში მისი მოცულობა 25.7 მლრდ. ლარით განისაზღვრა, რაც გასული წლის შესაბამისი პერიოდის მაჩვენებელზე 10.7%-ით მეტია.
განსხვავებული განაწილება იყო პროდუქციის მთლიანი გამოშვების შემთხვევაში: მსხვილ ბიზნესზე მოდიოდა პროდუქციის გამოშვების 48.6%-ი, საშუალოზე – 23.6%-ი, ხოლო მცირე ბიზნესზე – 27.8%-ი.
2026 წლის მე-2 კვარტალში, საწარმოთა მიერ განხორციელებულმა საქონლისა და მომსახურების მთლიანმა ყიდვებმა 32.5 მლრდ. ლარი (გასული წლის შესაბამის პერიოდთან შედარებით 4.9 პროცენტით მეტი), ხოლო გადასაყიდად განკუთვნილი საქონლისა და მომსახურების ყიდვებმა 19.4 მლრდ. ლარი (გასული წლის შესაბამის პერიოდთან შედარებით 9.3 პროცენტით მეტი) შეადგინა.
2026 წლის მე-2 კვარტალში ბიზნეს სექტორში დასაქმებულთა საშუალო რაოდენობა 828.4 ათასი კაცით განისაზღვრა, რაც გასული წლის შესაბამისი პერიოდის მაჩვენებელზე 4.1%-ით მეტია. დასაქმებულთა მთლიანი რაოდენობიდან 43.8%-ი ქალი იყო, ხოლო 56.2%-ი – კაცი.
დასაქმებულთა მთლიანი რაოდენობის 42.6%-ი მსხვილ ბიზნესზე მოდიოდა, 19.7%-ი – საშუალოზე, ხოლო 37.7%-ი მცირე ბიზნესზე. საანგარიშო პერიოდში დაქირავებულთა მთლიანმა რაოდენობამ 768.6 ათასი კაცი შეადგინა (გასული წლის შესაბამის პერიოდთან შედარებით 3.1 პროცენტით მეტი), ხოლო საწარმოთა მთლიანი დანახარჯები პერსონალზე 5.827 მლნ ლარით განისაზღვრა (გასული წლის შესაბამის პერიოდთან შედარებით 10.3 პროცენტით მეტი),“ – ნათქვამია „საქსტატის“ ინფორმაციაში.
მათივე მონაცემებით, 2026 წლის მე-2 კვარტალში, ბიზნეს სექტორში დაქირავებით დასაქმებულთა საშუალო თვიური ხელფასი 2 471.5 ლარს გაუტოლდა (გასული წლის შესაბამის პერიოდთან შედარებით გაზრდილია 153.8 ლარით), მათ შორის ქალების ხელფასმა 1 944.9 ლარი შეადგინა (გასული წლის შესაბამისი პერიოდთან შედარებით გაზრდილია 161.4 ლარით).
საწარმოთა ზომის მიხედვით საშუალო თვიური ხელფასი კი შემდეგნაირი იყო:
- მსხვილი ბიზნესი – 2 622.8 ლარი;
- საშუალო ბიზნესი – 2 918.9 ლარი;
- მცირე ბიზნესი – 1 972.3 ლარი.
„2026 წლის მე-2 კვარტალში ბიზნეს სექტორის ბრუნვის მოცულობის სტრუქტურაში ყველაზე მაღალი წილი, 36.5%-ი, მოდიოდა ხელოვნება, გართობა და დასვენების დარგზე, მეორე ადგილს იკავებდა ვაჭრობა (ავტომობილების და მოტოციკლების რემონტის ჩათვლით) 32.4%-იანი წილით, შემდეგ მოდიოდა დამამუშავებელი მრეწველობა – 8.1%-იანი წილით, ტრანსპორტი და დასაწყობება – 4.8%-იანი წილით, მშენებლობა 4.8%-იანი წილით, ინფორმაცია და კომუნიკაცია 3.4%-იანი წილით, ხოლო 10%-ი დანარჩენ დარგებზე განაწილდა.
2026 წლის მე-2 კვარტალში ბიზნეს სექტორის პროდუქციის გამოშვებაში პირველ ხუთ ადგილს დამამუშავებელი მრეწველობა (20.5%), ვაჭრობა (18%), მშენებლობა (14.4%), ტრანსპორტი და დასაწყობება (9.8%) და ინფორმაცია და კომუნიკაცია (8.9%) იკავებდა, ხოლო დანარჩენ დარგებს სტრუქტურაში ჯამურად 28.4%-იანი წილი ეჭირა.
2026 წლის მე-2 კვარტალში, დასაქმებულთა რაოდენობის მიხედვით ბიზნეს სექტორში ლიდერობდნენ ვაჭრობის (საბითუმო და საცალო ვაჭრობა; ავტომობილების და მოტოციკლების რემონტი), დამამუშავებელი მრეწველობისა და ჯანდაცვის და სოციალური მომსახურების საქმიანობების დარგები, შესაბამისად, 29.5, 11.3 და 9.1 პროცენტიანი წილებით.
სტრუქტურაში მნიშვნელოვანი წილი მოდიოდა ტრანსპორტისა და დასაწყობების (8.1%), მშენებლობის (7.6%), აგრეთვე ინფორმაციისა და კომუნიკაციის (6.4%) და განთავსების საშუალებებით უზრუნველყოფის და საკვების მიწოდების საქმიანობების (5.7%) დარგის საწარმოებზეც,“ – აღნიშნულია „საქსტატის“ მიერ გავრცელებულ ინფორმაციაში.
