ბოდბელი ეპისკოპოსი იაკობი კიდევ ერთხელ აცხადებს, რომ მის მიერ რამდენიმე დღის წინ გაკეთებული განცხადება სიმართლეა და საკუთარი სიტყვები უკან არ მიაქვს.
ქორეპისკოპოსი ცოტა ხნის წინ საპატრიარქოში მივიდა, თუმცა საპატრიარქოში შესვლამდე ჟურნალისტებთან განმარტება გააკეთა მის მიერ რამდენიმე დღის წინ გაკეთებულ განცხადებაზე, რომელიც პატრიარქის გადაყენების საკითხზე გიორგი კვირიკაშვილის, გიორგი გახარიასა და ვახტანგ გომელაურის მიერ მასთან შეხვედრას შეეხება.
მეუფე იაკობი კიდევ ერთხელ ამტკიცებს, რომ მაშინდელი პრემიერ-მინისტრის, გიორგი კვირიკაშვილის კაბინეტში გაიმართა შეხვედრა, რომელსაც იმჟამინდელი სუს-ის უფროსი ვახტანგ გომელაური და შს მინისტრი გიორგი გახარია ესწრებოდნენ.
„ძალიან ბევრი დაბრკოლდა ჩემი საუბრების გამო. ჩემი ლექსიკის გამო ძალიან ბევრი დაბრკოლდა და ყველას შენდობას ვთხოვ და ბოდიშს მოვუხდი, მაგრამ უნდა გაითვალისწინოთ ჩემი მდგომარეობა. სამი წელი ისეთი რაღაცები ვიცოდი… რაღაც პოლიტიკოსებთან ჩარევა გვიწევს ხოლმე. როგორც მონაზონს გულში მქონდა ხინჯი, ახლა კი ვარ თავისუფალი ადამიანი ეს რომ ვთქვი. რაც ვთქვი, ჩემი სიტყვები უკან არ მიმაქვს. სამი ადამიანი შემხვდა მე. მეოთხე არ შემხვედრია. ეს იყო პრემიერის კაბინეტში. თავად ბატონი გიორგი ბრძანდებოდა, ვახტანგ გომელაური და შს მინისტრი ბატონი გახარია. მინდა გითხრათ იქ რაც შევამჩნიე – უხერხულობას გრძნობდნენ რა თემაზეც მელაპარაკებოდნენ. ბატონ გიორგისაც შევამჩნიე ეს და ბატონ ვახტანგსაც. უწმინდესთან დაკავშირებით რაღაც მკითხეს და ეს მე უწმინდესს 10 დღე არ ვუთხარი, ბოლოს მაინც ვუთხარი და ღირსეული პასუხიც შევუთვალეთ უკან“, – განაცხადა მეუფე იაკობმა.
კითხვაზე: იყო თუ არა აღნიშნულ შეხვედრაზე საუბარი უწმინდესის ლიკვიდაციაზე, მეუფე იაკობმა აღნიშნა, რომ ამაზე არ იყო საუბარი, არამედ იყო იმაზე, რომ შეეცვალათ პატრიარქი და ასევე საუბარი შეეხო შემცვლელსაც. ამასთან, ბოდბელმა ეპისკოპოსმა აღნიშნა, რომ მოსაყდრე შიოს კანდიდატურა თავისთავად დადგებოდა პატრიარქის შემცვლელად, ვინაიდან ის პატრიარქის მოსაყდრეა და აქედან გამომდინარე, მისი კანდიდატურის დაყენება არ ნიშნავს, რომ ის „მთავრობის კაცია“.
შეგახსენებთ, რომ ბოდბელი ეპისკოპოსის, მეუფე იაკობის მიერ ორი დღის წინ გაკეთებული განცხადებით, გიორგი კვირიკაშვილი, გიორგი გახარია და ვახტანგ გომელაური მას პატრიარქის გადაყენებაში დახმარებას სთხოვდნენ.
