ანტარქტიდის შელფურ მყინვარს მანჰეტენზე დაახლოებით 70-ჯერ დიდი აისბერგი მოსწყდა
ევროპის კოსმოსური სააგენტოს ცნობით, ის ამჟამად უდიდესი აისბერგია მსოფლიოში.
ეს მოგრძო აისბერგი, სახელად “A76”, ამჟამად უედელის ზღვაში დაცურავს.
ევროპის კოსმოსური სააგენტოს ცნობით, მისი სიგრძე დაახლოებით 169 კილომეტრია, სიგანე 24 კმ, ზედაპირის ფართობი კი 4 320 კვადრატული კილომეტრი.
მიუხედავად იმისა, რომ ახალი აისბერგი მსოფლიოში ამჟამად უდიდესია, ის ისტორიაში 10 უდიდესი აისბერგის სიაშიც კი არ შედის. რეკორდს აისბერგი “A68a” ფლობდა, მისი ფართობი 6,000 კვადრატული კილომეტრი იყო და 2020 წლის დეკემბერში დაიშალა.
ამის შემდეგ რეკორდსმენი აისბერგი “A23A” გახდა. მისი ფართობი 4,000 კვადრატული კილომეტრია და ანტარქტიდას 1986 წელს მოსწყდა.
გინესის მსოფლიო რეკორდების თანახმად, ისტორიაში უდიდესი აისბერგი 1958 წელს შენიშნეს ატლანტის ოკეანის სამხრეთ ნაწილში. მისი ფართობი სავარაუდოდ 30,000 კვადრატული კილომეტრი იყო, თუმცა ეს მხოლოდ შეფასებაა, რადგან მეცნიერებს მაშინ თანამგზავრული ფოტოები არ გააჩნდათ.
