,,ქართული ოცნება_დემოკრატიული საქართველოს” ქუთაისის მაჟორიტარი დეპუტატობის კანდიდატი ზაზა ლომინაძე ქუთაისის მერობის კანდიდატთან იოსებ ხახალეიშვილთან ერთად, ,,აწარმოე საქართველოს” ფარგლებში გახსნილ საწარმო ,,Alutech Georgia“ -ში იმყოფებოდა და სამუშაო პროცესს ადგილზე გაეცნო.
როგორც ზაზა ლომინაძემ განცხადა მნიშვნელოვანია მსგავსი საწარმოების ხელშეწყობა და სამეწარმეო საქმიანობის გაფართოება.
„ქართული ოცნების“ ხელისუფლების ერთ-ერთ უმთავრეს მიზანს წარმოადგენს სამეწარმეო გარემოს გაუმჯობესება, კერძო სექტორის განვითარება, ქვეყნის საინვესტიციო კლიმატის პოპულარიზაცია. მე და იოსებ ხახალეიშვილი დღეს საწარმოში „Alutech Georgia“ დასაქმებულ ადამიანებს შევხვდით. ეს საწარმო პროექტ „აწარმოე საქართველოში“ ფარგლებში შეიქმნა, უცხოელი ინვესტორების თანამონაწილეობით. საწარმო თანამედროვე, მეტალო-პლასტმასის და ალუმინის კარ-ფანჯრებს აწარმოებს. ორიო თვეა, რაც პროდუქციის გამოშვება დაიწყეს და სამომავლოდ გაფართოებასაც აპირებენ. თითოეული დასაქმებული ადამიანის უკან მათი ოჯახები დგას. ჩვენი ვალია, ამ საწარმოებს შევუქმნათ კარგი სამუშაო გარემო, რომ მათ თავის მხრივ, მათთან დასაქმებული ადამიანების შრომის პირობებიც გააუმჯობესონ, წარმოებაც გაზარდონ და მეტი წვლილი შეიტანონ ქვეყნის ეკონომიკის განვითარებაში,”-განაცხადა ზაზა ლომინაძემ.
“ჩვენი გუნდისთვის ძალიან მნიშვნელოვანია ახალი საწარმოების გახსნა. საქართველოს მთავრობის ინიციატივით ხორციელდება სახელმწიფო პროგრამა „აწარმოე საქართველოში“, რომლის მიზანია ქვეყანაში მეწარმეობის განვითარება და მხარდაჭერა, ახალი საწარმოების შექმნის ხელშეწყობა და საექსპორტო პოტენციალის გაზრდა. ჩემი სურვილია, რაც შეიძლება მეტი დასაქმებული მოქალაქე ჰყავდეს ჩემს ქალაქს, რასაც მერობის შემთხვევაში განსაკუთრებულ ყურადღებას დავუთმობ“, – განაცხადა იოსებ ხახალეიშვილმა.
შპს “ალუტექ ჯორჯიას“ ქარხანა რამდენიმე თვეა, წარმატებით მუშაობს. “ალუტექ ჯორჯიას” საამქრო აღჭურვილია ულტრათანამედროვე დანადგარებით, რომელიც მომხმარებელს უმაღლესი ხარისხის პროდუქციას სთავაზობს.
