„ნამდვილად რთული პერიოდია, იქიდან გამომდინარე, რომ, მოგეხსენებათ, დიზელის ფასმა თითქმის 5 ლარს მიაღწია, რაც რეკორდულია და თან ეს ხდება მაშინ, როდესაც საშემოდგომო კულტურების, განსაკუთრებით მარცვლეულის, ხვნა-თესვის პერიოდია“, – ამის შესახებ ფერმერთა ასოციაციის ხელმძღვანელის მოადგილემ რატი კოჭლამაზაშვილმა, „პალიტრანიუსისა“ და რადიო „პალიტრას“ გადაცემაში „საქმე“ განაცხადა.
მისი თქმით, დიზელის ფასის ზრდა განსაკუთრებით მძიმე გავლენას მარცვლეული კულტურების მწარმოებლებზე ახდენს, რადგან დარგი მაღალი მექანიზაციითა და დაბალი მოგების მარჟით გამოირჩევა.
რატი კოჭლამაზაშვილის განმარტებით, თუ საწვავის მაღალი ფასი მოსავლის აღებამდე შენარჩუნდება, ფერმერებს ხარჯები კიდევ უფრო გაეზრდებათ, რაც მათ კონკურენტუნარიანობას შეამცირებს როგორც ადგილობრივ, ისე საერთაშორისო ბაზრებზე.
„ნამდვილად რთული პერიოდია, იქიდან გამომდინარე, რომ, მოგეხსენებათ, დიზელის ფასმა თითქმის 5 ლარს მიაღწია, რაც რეკორდულია. თან ეს ხდება მაშინ, როდესაც საშემოდგომო კულტურების, განსაკუთრებით მარცვლეულის, ხვნა-თესვის პერიოდია.
ეს არის დარგი, რომელიც ამას ყველაზე მძიმედ განიცდის, იმიტომ, რომ, ერთის მხრივ, ყველაზე მეტად მექანიზებულია და, შესაბამისად, საჭიროებს ტექნიკას, რომელიც დიზელს მოიხმარს, ხოლო, მეორეს მხრივ, მოგეხსენებათ, ერთ-ერთი ყველაზე დაბალი მარჟა სწორედ აქ არის.
ჩვენი თვითუზრუნველყოფის კოეფიციენტი, რომელიც ნიშნავს, რამდენს ვაწარმოებთ შიდა მოხმარების დასაკმაყოფილებლად, ყველაზე დაბალია. ხორბლის შემთხვევაში ეს მაჩვენებელი დაახლოებით 20%-ია, სიმინდთან დაკავშირებითაც სახარბიელო მდგომარეობა არ გვაქვს.
აქედან გამომდინარე, ამ პერიოდში, როდესაც საშემოდგომო კულტურების, ქერისა და ხორბლის თესვის სეზონია, საკმაოდ ცუდი საწყისი წერტილი გვაქვს. თუ ეს მდგომარეობა გაგრძელდა და ფერმერებს არა მხოლოდ ხვნა-თესვის, არამედ შემდგომი ოპერაციების შესრულებაც გაძვირებული დიზელით მოუწევთ, ზაფხულში, მოსავლის აღებისას, ეს ხარჯების ზრდას გამოიწვევს.
შესაბამისად, ფერმერების კონკურენტუნარიანობა შემცირდება, იმიტომ, რომ საქართველო მცირე, თუმცა ღია ეკონომიკაა და ქართველ ფერმერს უწევს ღია კონკურენციაში შესვლა როგორც მეზობელი ქვეყნების ფერმერებთან, ისე საერთაშორისო ბაზარზე არსებულ ფასებთან.
მოგეხსენებათ, საწვავის ფასების ზრდა საერთაშორისო პრობლემაა. ჩვენ ასევე მსოფლიო ფერმერთა ორგანიზაციის წევრები ვართ. გასულ თვეში ჟენევაში, მსოფლიო სავაჭრო ორგანიზაციაში, მეც ვიმყოფებოდი, სადაც განხილვის ერთ-ერთი ძირითადი საკითხი სწორედ ეს იყო.
სხვადასხვა ქვეყნის ფერმერებმა და მათი ასოციაციების წარმომადგენლებმა აქტიურად ისაუბრეს იმ პოლიტიკაზე, რომელიც მათ ქვეყნებში მოქმედებს.
რადგან ეს საერთაშორისო გამოწვევაა, მისი კონტროლი ძალიან რთულია. აქედან გამომდინარე, სახელმწიფოები შესაბამის პოლიტიკურ ბერკეტებს იყენებენ.
ძირითადად, ეს ფისკალური მექანიზმებია, მაგალითად, აგრარული დიზელისთვის აქციზის გაუქმება. დღგ-ის ნაწილში კი, ძირითადად, გადასახადის ჩათვლის მექანიზმი გამოიყენება.
ეს საქართველოშიც მოქმედებს, მაგრამ ამ მიმართულებით ფერმერები, როგორც წესი, გადასახადის გადამხდელ იურიდიულ პირებად არ არიან რეგისტრირებული, ამიტომ ეს საკითხი მათთვის დღის წესრიგში არ დგას ან მხოლოდ მცირე რაოდენობას ეხება.
შესაბამისად, ყველაზე ხშირად გამოყენებული მექანიზმები, რომლებსაც დღეს მსოფლიოს სხვადასხვა ქვეყანაში ვხვდებით, სწორედ აქციზსა და დღგ-ს უკავშირდება.
რატომ არის ამის განხორციელება საქართველოში რთული? – სამწუხაროდ, ქვეყანაში მიწის რეგისტრაციის პროცესიც კი არ დასრულებულა, ხოლო ფერმერთა რეგისტრაციის მიმართულებით მდგომარეობა კიდევ უფრო რთულია. ამიტომ მსგავსი პროგრამების განხორციელება დიდ სირთულეებთან არის დაკავშირებული.
მნიშვნელოვანია, რომ შეღავათები მიზნობრივად მიემართებოდეს სოფლის მეურნეობაში და იაფი დიზელის გამოყენებამ უბრალოდ საწვავის მოხმარების ზრდა კი არ გამოიწვიოს, არამედ შეღავათით უშუალოდ ფერმერებმა ისარგებლონ და საწვავი სოფლის მეურნეობაში გამოიყენონ.
თუ გასული წლის ანალოგიურ პერიოდს შევადარებთ, მაშინ დიზელის ფასი დაახლოებით 3 ლარი იყო, დღეს კი 5 ლარს უახლოვდება. მიმდინარე წელი კრიტიკულია, რადგან აგროსამუშაოები უკვე გაძვირებული დიზელით დაიწყო.
არავინ იცის, რა მოხდება მომავალში. მოგეხსენებათ, გლობალური მოვლენებია… ამიტომ მსგავსი მექანიზმების ამოქმედება, როგორც წესი, სწრაფ გადაწყვეტილებებს მოითხოვს“, – განაცხადა რატი კოჭლამაზაშვილმა.
