“კაცი, რომელიც დაგვაკლდა ყველას” – ხონის კულტურის ცენტრი სახალხო თეატრის მსახიობს ზურაბ ჯალაღანიას ემშვიდობება.
“მეგა ტვ” პოსტს უცვლელად გთავაზობთ
“კაცი, რომელიც დაგვაკლდა ყველას, უამრავი დადებითი თვისებით გამოირჩეოდა ზურაბ ჯალაღანია, ჩვენი ხიჭინა _ ღიმილიანი შეხვედრა, ადამიანების სიყვარულით მოციმციმე თვალები და მხოლოდ მისთვის დამახასითებელი იუმორი სიცოცხლეზე შეყვარებული კაცის სავიზიტო ბარათი გახლდათ.
ყველა უყვარდა და ყველას უყვარდა ნიჭიერი ხელოვანი, ხონის კულტურის ცენტრის სახალხო დასის მსახიობი, ფოლკლორულ ანსამბლ „იმერის“ სოლისტი, პოეზიასა და ხელოვნებაზე შეყვარებული ადამიანი, რომელმაც ჯერ კიდევ ახალგაზრდა ასაკში_ 58 წლისამ გადაწყვიტა ჩვენგან წასვლა.
1982 წლიდან ზურაბ ჯალაღანია ხონის კულტურის სახლში გამართული ყველა ღონისძიების აქტიური მონაწილე, 1993 წლიდან სოფელ მათხოჯის კულტურის სახლის სამხატვრო ხელმძღვანელი, 2007 წლიდან კი კულტურის ცენტრის ტექნიკური რეჟისორია.
მრავალი თეატრალური ფესტივალის ლაურეატი, პრიზებისა და ტიტულების მფლობელი დახლდათ ჩვენი უზარმაზარი კოლექტივის ერთგული და თავმდაბალი წევრი _ ,,მაია წყნეთელი“, ,,მკვლელობა სადგურზე“, ,,რომეო და ჯულიეტა“, ,,ყვარყვარე თუთაბერი“, „ცილინდრი“, ,,მდგმურები“, „ჰელადოსი“, „თეთრი ბაირაღები“, „მე ვხედავ მზეს“, „ათვინიერებენ მიმინოს“, „ნატაძრალზე“, ,,ნაცარქექია“ და კიდევ მრავალი სხვა, ხონის სახალხო დასის მიერ განხორციელებული სპექტაკლების ის მცირე ჩამონათვალია, რომლებშიც ზურაბ ჯალაღანიამ ყველასთვის დასამახსოვრებელი და დამახასიათებელი როლები შექმნა და კიდევ უფრო შეაყვარა თავი ქართველ მაყურებელს.
ყველას დაგვაკლდი, ჩვენო ზურაბ და გვიკვირს, ასე ძლიერ რატომ გვატკინე გული, როდესაც თავად უსაშველოდ დიდი სიყვარული შეგეძლო.” – ვკითხულობთ ხონის კულტურის ცენტრის ფეისბუკ გვერდზე.