ქუთაისის საერთაშორისო აეროპორტში სარეკლამო მომსახურებას აეროპორტის მფლობელი სახელმწიფო კომპანია „საქართველოს აეროპორტების გაერთიანება“ ახორციელებს – ამის შესახებ bm.ge წერს.
როგორც ირკვევა, ამის მიზეზი ის არის, რომ „აეროპორტების გაერთიანებამ“ ქუთაისის აეროპორტის ტერიტორიაზე სარეკლამო მომსახურების ექსკლუზიურ უფლების გადაცემაზე აუქციონი გასული წლის ბოლოს გამოაცხადა და გამარჯვებული კომპანიაც გამოვლინდა, მაგრამ მასთან ხელშეკრულება არ გაფორმებულა.
გამარჯვებულ კომპანიაზე ინფორმაცია საჯარო არ არის. შესაბამისად, BMG-ისთვის უცნობია, რომელმა კომპანიამ გაიმარჯვა შერჩევის პირველ ეტაპზე.
ასევე, უცნობია აეროპორტში რეკლამის განთავსებაზე დღეს არსებულ ტარიფებზე ინფორმაცია. BMG-ის მცდელობის მიუხედავად, სახელმწიფო კომპანიაში ირწმუნებიან, რომ ეს ინფორმაცია საჯარო არ არის.
აღსანიშნია, რომ ჯერჯერობით, „აეროპორტების გაერთიანებაში“ არც იმაზე აქვთ პასუხი, გამოაცხადებენ თუ არა განმეორებით აუქციონს სარეკლამო მომსახურების გაყიდვაზე.
აეროპორტების გაერთიანების მიერ გამოცხადებული აუქციონის თანახმად, აუქციონში მონაწილეობის მიღების უფლება ჰქონდა ყველა სუბიექტს, რომელსაც გააჩნდა სამეწარმეო საქმიანობის განხორციელების უფლება და აკმაყოფილებდა აუქციონით დადგენილ კრიტერიუმებს, რაც გულისხმობს რომ კომპანიას დახურულ ან/და ღია სივრცეში რეკლამის გაყიდვისა და განთავსების გამოცდილება ჰქონდა.
კომპანიას 2015-დან 2019 წლის ჩათვლით რომელიმე წელს უნდა ჰქონოდა 500 ათას ლარი ან მეტი ბრუნვა, დღგ-ს გარეშე. ამას გარდა, გამარჯვებულ კომპანიას აეროპორტის შესაბამისი აღჭურვის მიზნით, არანაკლებ 2 მლნ ლარის ინვესტიცია უნდა განეხორციელებინა.
კომპანიას დავით აღმაშენებლის სახელობის აეროპორტში სარეკლამო უფლებით სარგებლობა 10 წლის ვადით შეეძლო, ხოლო მხარეთა შეთანხმებით, ხელშეკრულების ვადა შესაძლებელია არაუმეტეს 5 წლის ვადითაც გაგრძელებულიყო. აუქციონის პირობები ასევე გულისხმობდა კომპანიის წლიურ გადასახადს, რაც იცვლებოდა მგზავრების რაოდენობის მიხედვით.
საუბარია გადახდის ასეთ სქემაზე:
0 – 500,000 მგზავრი – 7,550.0 (შვიდიათასხუთასორმოცდაათი) ლარი დღგ-ს ჩათვლით;
500,001 – 1,000,000 მგზავრი – 30,000.0 (ოცდაათიათასი) ლარი დღგ-ს ჩათვლით;
1,000,001-დან და ზემოთ მგზავრი – 40,000.0 (ორმოციათასი) ლარი დღგ-ს ჩათვლით.
2015 წლიდან 2020-წლამდე ქუთაისის აეროპორტზე მგზავრთნაკადი მნიშვნელოვნად იზრდებოდა და 2019 წელს მგზავრების რაოდენობამ 870 ათასაც კი გადააჭარბა. მიმდინარე წლის ორი კვარტლის მონაცემებით, ქუთაისის აეროპორტი ჯამში 328 386 მგზავრს მოემსახურა.