ჩოგბურთელი ნიკოლოზ ბასილაშვილის გარშემო ახალი სკანდალი გორდება. როგორც რამდენიმე უცხოური გამოცემა, მათ შორის Gotennis.ru და ВсёПроСпорт” იუწყება, ნიკოლოზ ბასილაშვილს ძველი ინვესტორი უჩივის. ჯერჯერობით, მისი ვინაობა არ სახელდება და ალბათ მოგვიანებით გახდება ცნობილი, თუმცა დავის მიზეზი კი გაცხადდა.
ყოფილი ინვესტორის მტკიცებით, ბასილაშვილის წინსვლაში და მომავალ წარმატებაში მნიშვნელოვანი წვლილი შეიტანა და ტურნირებიდან მიღებული საპრიზო თანხის გარკვეულ ნაწილს ითხოვს.
„ნიკოლოზ ბასილაშვილს ქართულ სასამართლოში ყოფილ მეუღლესთან აქვს დავა. მას ძალადობაში ადანაშაულებენ. ახლა კი კიდევ ერთი მომჩივანი გამოჩნდა. ინვესტორი, რომელიც ჩოგბურთელისგან თანხას ითხოვს.
საქართველოს სასამართლოში და საერთაშორისო არბიტრაჟში მრავალმილიონიანი საქმის განხილვა უახლოეს ხანებში დაიწყება“ – ამბობს ინკოგნიტო პირი უცხოურ მედიასთან კომენტარში.
ცნობისთვის, საქართველოს პროკურატურამ ყოფილი მეუღლის მიმართ განხორციელებული ფიზიკური ძალადობის ფაქტზე ნიკოლოზ ბასილაშვილს ბრალდება საქართველოს სისხლის სამართლის კოდექსის 126-ე პრიმა მუხლის მე-2 ნაწილის „ბ“ ქვეპუნქტით წარუდგინა, რაც გულისხმობს ოჯახში ძალადობას არასრულწლოვნის თანდასწრებით. მოგვიანებით პროკურატურამ ბასილაშვილს ბრალდება დაუზუსტა და მას ძალადობის რამდენიმე ეპიზოდთან ერთად, ფსიქოლოგიურ და ეკონომიკურ ძალადობასაც ედავებიან.
პროკურატურის ინფორმაციით, გამოძიებით დადგინდა, რომ 2020 წლის 21 მაისს, თბილისში, ავჭალის დასახლებაში, ნიკოლოზ ბასილაშვილმა ურთიერთშელაპარაკების ნიადაგზე, ყოფილი მეუღლის ნელი დოროყაშვილის მიმართ ფიზიკური ძალადობა განახორციელა. სამართალდამცველებმა ნიკოლოზ ბასილაშვილი 2020 წლის 22 მაისს დააკავეს. სასამართლომ ბასილაშვილის აღკვეთის ღონისძიების საკითხზე იმსჯელა და ის 100 000-ლარიანი გირაოს სანაცვლოდ გაათავისუფლა.
მომდევნო სხდომა 19 აპრილს, 14:00 საათზე ჩაინიშნა.
