აკაკი წერეთლის სახელმწიფო უნივერსიტეტი სამძიმრის წერილს აქვეყნებს და საქართველოს დამსახურებულ არტისტს გიორგი, ჟორა ლომთაძეს ემშვიდობება.
“ღრმა მწუხარებას გამოვხატავთ აკაკი წერეთლის სახელმწიფო უნივერსიტეტის პროფესორის, საქართველოს სახალხო არტისტისა და ქართული მუსიკალური კულტურის გამორჩეული წარმომადგენლის, გიორგი ლომთაძის გარდაცვალების გამო.
გიორგი ლომთაძე იყო გამორჩეული მომღერალი, ოპერის სოლისტი, აკადემიკოსი და მრავალი თაობის აღმზრდელი. მისი მრავალწლიანი პროფესიული საქმიანობა მჭიდროდ უკავშირდებოდა ქუთაისის მუსიკალური ცხოვრების განვითარებას, საოპერო ხელოვნებისა და ვოკალური სკოლის გაძლიერებას.
იგი მრავალი წლის განმავლობაში ღირსეულად ემსახურებოდა აკაკი წერეთლის სახელმწიფო უნივერსიტეტს, სადაც პროფესორის რანგში ეწეოდა ნაყოფიერ პედაგოგიურ და შემოქმედებით საქმიანობას. მანამდე კი ხელმძღვანელობდა ვ. სარაჯიშვილის სახელობის თბილისის სახელმწიფო კონსერვატორიის ქუთაისის ფილიალის სოლო აკადემიური სიმღერის კათედრას.
გიორგი ლომთაძე იყო მაღალი პროფესიონალიზმის, შემოქმედებითი კულტურისა და პედაგოგიური თავდადების მაგალითი. მისი აღზრდილი არაერთი შემსრულებელი დღეს წარმატებით საქმიანობს საქართველოსა და მის ფარგლებს გარეთ.
ვუსამძიმრებთ ბატონი გიორგის ოჯახს, ახლობლებს, კოლეგებს, სტუდენტებსა და ქართული მუსიკალური საზოგადოების წარმომადგენლებს.” – ნათქვამია გავრცელებულ განცხადებაში.
