5 მარტს ხაშურის ცენტრში სალომე ჩიქოვანი ყოფილმა ქმარმა უამრავი ადამიანის თვალწინ დაჭრა. ის უმძიმეს მდგომარეობაში გადაიყვანეს საავადმყოფოში. ახლობლები ყველას სთხოვენ, რომ მისი გადარჩენისთვის ილოცონ.
სოციალურ ქსელში წერენ, რომ სალომე გაჭირვებაში გაიზარდა, მან შიმშილს გაუძლო, მაგრამ სადისტ ქმარს – ვეღარ.
სალომეს მასწავლებელი მაია ციცქიშვილი ფეისბუქში წერს:
,,ეს სალომეა, გოგონა რომელიც ყოფილმა ქმარმა დაჭრა, დღეს სიკვდილს ებრძვის. წარმოდგენა არავის შეუძლია, რას გაუძლო ამ თითისტოლა გოგომ, რომ გაზრდილიყო. გაუძლო სიცივეს, შიმშილს, ყველაფერს თუ რამე არსებობს, ვერ გაუძლო ქმარს და ამისთვის გაიმეტეს.
მე მის დაბადებას შევესწარი, მისი გაზრდას ვუყურებდი და მისი ტკივილი დღეს ჩემი ტკივილია. მძულს კაცთა მოდგომა ქალზე მოძალადე, მძულს სამყარო, სადაც ქალი დაუცველია, მძულს ყველა, ვინც გამართლებას მოუნახავს ამ საქციელს. შესთხოვეთ უფალს, რომ გადარჩეს. ვისაც შეგიძლიათ, ღმერთს ხმა მიაწვდინოთ”, – დაწერა სალომეს პედაგოგმა.
როგორც წერენ, სალომეს ბევრი კეთილი ადამიანი პატრონობდა. ,,ყველა ოჯახის შვილი”, – წერია კომენტარებში.
,,როგორ უხაროდა ნაჩუქარი ტანსაცმელი და როგორ იპრანჭებოდა. სხვას რომ არაფრად მიაჩნდა, მისთვის ფუფუნება იყო”, ,,ჩემო პატარა გოგო, უფალო შენკენ, შენ ისეთი მაგარი გოგო ხარ, ამასაც გაუძლებ. გაუძელი, ჩემო გოგო, შენი შვილებისთვის”, ,,სალომემ ბევრ გაჭირვებას გაუძლო და კიდევ გაუძლებს. ამ სირთულესაც გადალახავს, იბრძოლებს გადარჩენისათვის”, – წერენ სოციალურ ქსელში დაჭრილი ახალგაზრდა ქალის ნაცნობები.
სალომეს კლასელი ნიკა ივანაშვილი წერს, რომ ელოდებიან სალომეს მდგომარეობიდან გამოსვლას.
,,ეს ჩვენი დაიკოა და გაუძლო ყველაფერს. ველოდებით მდგომარეობიდან გამოსვლას”- დაწერა ნიკა ივანაშვილმა, რომელსაც მაია ციცქიშვილმა სკოლის პერიოდი შეახსენა, როგორ უდგნენ ბავშვები ერთმანეთს გვერდით.
,,ყველაფერი ერთად მახსენდება და გული მიკვდება. ის ვაშლები მახსენება, დასვენებაზე ერთმანეთს რომ უწილადებდით. არ ვიცი, თუ ვინმეს უნახავს თითებით ვაშლის დანაწილება, ზოგჯერ ათ ნაწილად. ვიცი, რომ ერთმანეთის იმედებად დაიზარდეთ. მიყვარხართ და ღმერთს ვთხოვ თქვენს ბედნიერებას, სალომეს სიცოცხლეს, რომელმაც ბევრ გაჭირვებას გაუძლო და კიდევ გაუძლებს. ამ სირთულესაც გადალახავს, იბრძოლებს გადარჩენისათვის”, – წერს მაია ციცქიშვილი.
