საქართველოში საგზაო-სატრანსპორტო შემთხვევების სტატისტიკა კვლავ საგანგაშო სურათს აჩვენებს. შინაგან საქმეთა სამინისტროს მონაცემებით 2025 წლის იანვრიდან სექტემბრის ჩათვლით, სისხლის სამართლის კოდექსის ფარგლებში, ქვეყანაში 4 480 საგზაო-სატრანსპორტო შემთხვევა დაფიქსირდა.
შემთხვევების შედეგად 345 ადამიანი დაიღუპა, ხოლო 6 041 მოქალაქე დაშავდა.
იმერეთი ერთ-ერთ წამყვან რეგიონად დასახელდა შემთხვევების რაოდენობის მიხედვით. ოფიციალური მონაცემებით, რეგიონში 497 საგზაო-სატრანსპორტო შემთხვევა დაფიქსირდა, რაც იმერეთს საქართველოში ყველაზე მაღალი მაჩვენებლის მქონე რეგიონებს შორის აყენებს.
შემთხვევების რაოდენობით პირველ ადგილზეა თბილისი – 1 990 შემთხვევით, შემდეგ მოდის აჭარა – 499 შემთხვევა, ხოლო მესამე პოზიციას სწორედ იმერეთი იკავებს.
სტატისტიკის მიხედვით, საგზაო-სატრანსპორტო შემთხვევების ყველაზე ხშირ გამომწვევ მიზეზებს შორისაა:
- დადგენილი სიჩქარის გადაჭარბება
- დისტანციის დაუცველობა
- შემხვედრ მოძრაობის ზოლში გადასვლა
- სატრანსპორტო საშუალების მართვა ალკოჰოლური სიმთვრალის მდგომარეობაში
- საგზაო ნიშნებისა და მონიშვნის დაუმორჩილებლობა
სპეციალისტების შეფასებით, არსებული მდგომარეობა კიდევ ერთხელ უსვამს ხაზს საგზაო უსაფრთხოების წესების დაცვის აუცილებლობას, როგორც მძღოლების, ისე ქვეითების მხრიდან.
