საპატრიარქოს პრესსამსახურის უფროსი ანდრია ჯაღმაიძე დმანისში განვითარებულ მოვლენებს დღეს პრესკონფერენციაზე გამოეხმაურა. თქვა, რომ მშვიდობისკენ გადადგმული ნაბიჯები სასიხარულოა, თუმცა ამ ნაბიჯებს გამყარება და წახალისება სჭირდება.
”იმ დღეს მშვიდობისკენ გადაიდგა ნაბიჯი, ჩვენთვის ეს ძალიან სასიხარულოა ამბავია. დღეს ყველა ვაცნობიერებთ, რომ ამ ნაბიჯს სჭირდება გამყარება, წახალისება, რომ საბოლოოდ მოხდეს აღმოფხვრა იმ საფუძვლებისა, რომლებზეც შესაძლოა მსგავსი უსიამოვნება მომხდარიყო.
კონფლიქტის დარეგულირებაში და შერიგებაში მონაწილეობდა სხვადასხვა მხარე, სახელმწიფო თავისთავად, მუფტი, ადგილობრივი სასულიერო პირები და მათ შორის საპატრიარქოც.
იქ იყვნენ ასაკოვანი ადამიანები, რომლებსაც გარკვეული ავტორიტეტი აქვთ მოსახლეობაში, მათი ჩართულობით ჩვენთან ერთად, პირველი ნაბიჯი გადაიდგა მშვიდობისკენ და მადლობა ეკუთვნის ყველას და მოურიდებლად შემიძლია ვთქვა, რომ საპატრიარქოს მათ შორის”, – თქვა ჯაღმაიძემ.
საუბრისას დეკანოზი ანდრია ჯაღმაიძე მის გუშინდელ განცხადებასაც გამოეხმაურა, რომელშიც მან დმანისს “არასახარბიელო ეთნიკური ბალანსის მქონე რეგიონი უწოდა”. მისი განმარტებით, მან მხოლოდ ის იგულისხმა, რომ “იქ ურთიერთობები ფაქიზია და განსაკუთრებით მოსაფრთხილებელია, რომ ვინმემ არ ისარგებლოს და იოლად უსიამოვნება არ შეიტანოს”.
ცნობისთვის, 16 მაისს დმანისში, 9 აპრილის ქუჩაზე, ადგილობრივ აზერბაიჯანულ თემსა და სვანეთიდან ჩასახლებულ ეკომიგრანტებს შორის დაპირისპირება მოხდა. ახალგაზრდები ერთმანეთს ჯოხებითა და ბიტებით დაუპირისპირდნენ, დაზიანდა ახლომდებარე მაღაზიებიც.
