ბალდელებს “კანიონი 350″-ის დირექტორმა და თანამშრომლებმა ფიზიკური და სიტყვიერი შეურაცხყოფა მიაყენეს.
გუშინ ოთხ ადგილობრივს 10-15 თანამშრომელი დაუპირისპირდა და ერთ-ერთ ახალგაზრდას დაზიანებაც მიაყენეს.
,,მეგა ტვ”- ს მომხდართან დაკავშირებით ბალდის კანიონის შენარჩუნებისთვის ჯგუფის წევრი თაზო რუხაია ესაუბრა:
,,პროვოკაციაზე წამოვიდნენ აშკარად. როგორც ყოველდღე ამ დილით ვპატრულირებდით, ჩვენ ყოველთვის ვამოწმებთ რა სამუშაოები მიდის და თუ ვხედავთ უხეშ ჩარევას ვრეკავთ გარემოს დაცვაში. ანალოგიური მოხდა ამ დილით, შევედით საჯარო სივრცეში, ვიღებდით რა სამუშაოებს აწარმოებდნენ, ხრეშის ტომრები დაცალეს. რომ დასრულდა ეს ამბები ვიდეო გავთიშეთ. რომ დაინახეს კამერა გავთიშეთ გადმოვიდნენ სიტყვიერ შეურაცხყოფაზე, ჩვენ ვცადეთ რომ სიტუაცია არ გაგვემწვავებინა, მათ ისევ გააგრძელეს ანალოგიური და შემდეგ გადმოვიდნენ ფიზიკურ შეურაცხყოფაზე. პირველი ადამიანი ვინც ხელი დამარტყა იყო თვითონ ინვესტორი გიორგი მერკვილაძე. ჩვენ ვიყავით ოთხი ადამიანი, ისინი იყვნენ დაახლოებით 15 ადამიანი და ეს 15 ადამიანი ფიზიკურად გაგვისწორდა ოთხ ადგილობრივს. ამის შემდეგ გამოვიძახეთ პოლიცია. პოლიციის უფროსი და მისი მოადგილე იყვნენ უშუალოდ ამოსული იმ ადგილზე სადაც მოხდა ეს ინცინდენტი. არ მოსულან ჩვენთან, იმ ადამიანებთან, ვინც მათი დახმარება ითხოვა. იყვნენ ინვესტორთან და ჰქონდათ ალბათ შინაურული საუბარი, იმიტომ რომ ჩვენ შემჩნეული გვყავს ისინი პირადად მეგობრობენ. ამ შეხვედრის შემდეგ პოლიციელებმა დატოვეს ტერიოტირია, ისე რომ ჩვენთან არც მოსულან და არც უკითხავთ რა ხდება. ჩვენს საჩივარზე იყო აშკარა გულგრილობა მათი მხრიდან.” – ამბობს თაზო რუხაია.
მისივე თქმით ბალდის კანიონის გადარჩენისთვის მებრძოლი ახლაგაზრდები, რომლებიც ამ ინცინდენტში მოყვნენ მარტვილის პოლიციაში თავად მივიდნენ და ფაქტის შესახებ პოლიციას ოფიციალურად აცნობეს. როგორც მან ჩვენთან საუბარში აღნიშნა, უშუალოდ განყოფილებაში გამოცხადების შემდეგ ისინი დაკითხეს. რაც შეეხება დაპირისპირების შედეგად მიღებულ დაზიანებებს თაზო რუხაია აცხადებს რომ ექსპერტიზას უნდა მიმართოს:
,,ექსპერტიზაზე უნდა წავიდე აუცილებლად, რადგან აშკარად არის პატარა დაზიანებები, მაგრამ არც ისეთი მძიმე, იმიტომ რომ ეს წინასწარ ჰქონდათ განსაზღვრული, ისეთი დაზიანებები არ უნდა მოეყენებინათ რაც დამეტყობოდა. სახის და თავის არეში არ დაურტყამთ, მაგრამ წელის არეში, ზურგში ასე აშკარად 5-6 ადამიანი მირტყამდა და დანარჩენებიც განეიტრალებული ჰყავდათ, რიცხობრივი უპირატესობით ისარგებლეს.” – ამბობს თაზო რუხაია.
როგორც ბალდის კანიონის შენარჩუნებისთვის ჯგუფის წევრი აცხადებს, ინცინდენტის შემდეგ მათ მარტვილის მერის მოადგილეს, ალექსანდრე ხურცილავას დაურეკეს, რათა ის ადგილზე ასულიყო და სიტუაციაში გარკვეულიყო, თუმცა მისგან არც თუ ისე სახარბიელო პასუხი მიიღეს:
,,ასეთი დაძაბულობის შემდეგ რამდენიმე წუთში მთელი სოფლის მოსახლეობა იქ იყო მობილიზებული, ეს ხალხი შევაკავეთ, წარმოიდგინეთ ჩვენსავე სოფელში 4 ახალგაზრდა გვცემეს და ეს ხალხი იყო განრისხებული. ჩვენც ვცადეთ რომ მერის მოადგილე მოსულიყო და გარკვეულიყო, დავურეკეთ, სამი თუ ოთხი ზარი განვახორციელეთ და ბოლოს პასუხი იყო ,,თქვენ ვინ ჩემი ფეხები ხართ მანდ მოვიდე და თქვენს ნარეკებზე ვიაროო” – ასე სიტყვა-სიტყვით მოგვმართა სოფლის მოსახლეობას, თავად ბალდის მკვიდრია და ჩვენი ნათესავია, მინდა რომ ამას ხაზი გავუსვა. ეს ადამიანი დღეს აღნიშნავს თავის დაბადების დღეს, ძალიან გრანდიოზულად, რესტორანში.” – განაცხადა ,,მეგა ტვ”-თან საუბრისას ბალდის კანიონის შენარაჩუნებისთვის მებრძოლმა თაზო რუხაიამ.
ბალდის კანიონის მცველები კარავში უკვე პროტესტის მე-12 ღამეს ათევენ.
ცნობისთვის, ბალდელები უკვე რამდემე თვეა იბრძვიან კანიონის გადარჩენისთვის. მთავრობამ ბალდის უნიკალური კანიონი 40 წლით გადასცა კერძო პირს, რომელსაც რუსეთთან აქვს კავშირები.
