მისი თქმით, ოფიციალური სტატისტიკის მიხედვით, საერთაშორისო ვიზიტორების დიდი რაოდენობა, რეალურ სურათს არ შეესაბამება, რადგან ყველა ადამიანი, ვინც საქართველოს ტერიტორიაზე 24 საათზე მეტხანს გაჩერდა, ტურისტი არ ყოფილა.
ცნობისთვის, საქსტატის მონაცემებით, 2023 წლის I-II კვარტალში, საქართველოში 2,860 მლნ საერთაშორისო ვიზიტორი დაფიქსირდა, აქედან 1,930 მლნ ტურისტული ვიზიტი იყო, ხოლო 599 ათასი ერთდღიანი.
მართალია, ძალიან ვეცადეთ ბერლინის გამოფენაზეც და საერთაშორისო სხვა გამოფენებზეც, მაგრამ გვინდა თუ არა, ჩვენ მოვიაზრებით რეგიონად, სადაც არის კონფლიქტური სიტუაცია. აქედან გამომდინარე, არ უნდათ. ეს არის ხალხი, რომელიც მიჩვეულია უსაფრთხო ცხოვრებას, მათთვის ტოპ პრიორიტეტია უსაფრთხოება, ამიტომ, თუ ფიქრობენ, რომ სადმე მათ მოგზაურობას შეიძლება საფრთხე შეექმნას, ასეთ მიმართულებებს დიდად არ ირჩევენ. ამან გამოიწვია ის, რომ ჩვენ ძალიან შეგვიმცირდა ევროპიდან შემოსული ხალხი.
რუსეთ-უკრაინის ომის დაწყებისთანავე, ჩაიხსნა ძალიან ბევრი ჯგუფები. მაგრამ რასაც ვუყურებთ, ომი რამდენი ხანია მიმდინარეობს, ჩვენამდე არც მოსულა და იმედია, არც მოვა, მიუხედავად ამისა, ჯავშნები მაინც შემცირებულია ევროპის მხრიდან. სამაგიეროდ, გააქტიურებულია აზიური ბაზარი, გააქტიურდნენ ჩვენი მეზობლები. თუმცა ჩვენი მეზობლებიდანაც და სხვათა შორის, უკრაინიდანაც ცოტა უცნაურია, ექსპატი ვინ არის და მოგზაური ვინ არის – მაგის გარკვევა. ჯერ ერთი წელი არ არის, რაც ქვეყანაში შემოსვლა დაიწყეს და ტურისტი არის ის, ვინც რომელიღაც ქვეყანაში 24 საათიდან 1 წლამდე ვადით ცხოვრობს, საიდანაც ფინანსურ სარგებელს არ იღებს. ეს არის მსოფლიო ტურიზმის ორგანიზაციის ტურისტის განმარტება. თემა ის არის, რომ ესენი რომ შემოდიან, შემოსავალს და სარგებელს აქვე იღებენ, მუშაობენ, რაღაცას ხსნიან. ისინი უკვე არ ითვლებიან ტურისტებად, მერე რა, რომ მათ არ აქვთ ქართული პასპორტი და ერთ წელზე ნაკლები დროა, რაც საქართველოში ცხოვრობენ. რა თქმა უნდა, სტატისტიკაში ეს ცდომილებას მოგვცემს, და ძალიან დიდს.
ჩემი გამოთვლით, 2,3 მლნ ვიზიტორიდან, სუფთა ტურისტი არ იქნებოდა ალბათ, 800 ათასზე მეტი. პირველ ადგილებზე არიან თურქეთი, სომხეთი, აზერბაიჯანი, რუსეთი, რომლებთანაც სახმელეთო მიმოსვლა გვაქვს. თქვენ იცით, საკმაოდ ცუდი მდგომარეობაა ჩვენს გზებზე და შესაბამისად, ვინც გაჩერდა ჩვენთან 24 საათზე მეტი, ყველა ჩაითვალა ტურისტად. მარტო ეს ხალხი რომ გამოვაკლოთ… არ არსებობს, თურქეთიდან ამდენი ტურისტი არ გვყავს. არ ითვლება ტურისტად ის ადამიანი, ვინც გადმოდის სარფიდან, რაღაც თავის საქმეს გააკეთებს, მერე ვერ მოასწრებს, რჩება ერთი დღე და უკან მიდის. ისევე, როგორც ის ტრაილერის მძღოლი…
შემოსავლებში ეს ნახეთ როგორ აისახება, თუ 2015-16 წლებში ერთი ტურისტის მიერ დახარჯული თანხა დაახლოებით, 63-64 დოლარი იყო (დღიურად) მერე ეს ჩამოვიდა 59 დოლარამდე, ახლა კიდევ უფრო ქვემოთ წამოვა. ანუ, თუ ჩვენ ჩვეულებრივ ვიზიტორსაც, რომელიც საერთოდ არ ხარჯავს ფულს (უბრალოდ შემოვიდა, გზა გაიარა და გავიდა), და ტურისტს ერთმანეთში ავურევთ, ამის ხარჯვით წილი გადანაწილდება ჩვეულებრივ ვიზიტორზეც და შემცირდება. ესეც ერთ-ერთი ლაკმუსის ქაღალდია, როგორ შეიძლება გავარკვიოთ ნამდვილად მოგზაური იყო თუ არა. იმიტომ, რომ სასტუმროები, 2021-22 წლებთან შედარებით გაძვირდა, შესაბამისად, უნდა მომატებულიყო დღიური ხარჯვითი წილიც და არ მომატებულა. პირიქით, დაიკლო. ამას მივყავართ ლოგიკამდე, რომ სწორად არ არის დათვლილი. თუ იმასაც შევხედავთ, რომ ტოპ-3-ეულში არის ის ქვეყნები, რომელთანაც სახმელეთო მიმოსვლა გვაქვს, ეს უკვე კითხვის ნიშნებს აღარ ტოვებს, რაღაც სხვა არის მოსაფიქრებელი, როგორ უნდა დავითვალოთ ნამდვილი ტურისტი და განვასხვაოთ ვიზიტორისგან და ტრანზიტით მოსარგებლისგან, რომელიც აქ ერთ ღამეს გაათევს“,- აღნიშნა მაია მურაჩაშვილმა.
