ხონის მუნიციპალიტეტი „ღია მმართველობის პარტნიორობის“ (OGP) ლოკალური პროგრამის წევრად აირჩიეს.
OGP-ში გაწევრიანებით ხონის მუნიციპალიტეტი უერთდება გლობალურ მოძრაობას რათა ხელი შეუწყოს სხვადასხვა ფორმით ადგილობრივ დონეზე ღია მმართველობის პრინციპების გამტკიცებას. პროგრამის მონაწილე მუნიციპალიტეტებს შესაძლებლობა მიეცემათ ითანამშრომლონ სხვადასხვა ქვეყნის წარმომადგენლებთან, გაუზიარონ მათ ცოდნა და გამოცდილება და დანერგონ სიახლეები ადგილობრივ დონეზე.
ღია მმართველობის კუთხით განხორციელებული ინოვაციური ინიციატივები და სამოქალაქო საზოგადოებასთან წარმატებული თანამშრომლობა ხონის მუნიციპალიტეტის შერჩევის ერთ-ერთი საფუძველი გახდა. მუნიციპალიტეტში ღია მმართველობის გაძლიერების მიმართულებით, სამოქალაქო საზოგადოებასთან თანამშრომლობით არაერთი პროექტი განხორციელდა, მათ შორის, მერიის მოქალაქეთა მისაღებმა ერთი ფანჯრის პრინციპით დაიწყო ფუნქციონირება; საჯარო სერვისების დისტანციურად მიწოდების განვითარების მიზნით დაინერგა ცხელი ხაზი და განახლდა ვებგვერდი.
ხონის მერი ლადო ჯურხაძე მიესალმება ხონის მუნიციპალიტეტის OGP-ის ლოკალურ პროგრამაში გაწევრიანებას და იმედოვნებს, რომ მუნიციპალიტეტს ორგანიზაციის წევრები როგორც ეროვნულ, ასევე ადგილობრივ დონეზე, ღია მმართველობის გაუმჯობესების კუთხით ბევრ მნიშვნელოვან ცოდნას გაუზიარებენ.
„მოხარული ვარ, რომ ხონის მუნიციპალიტეტი შეუერთდა ღია მმართველობის პარტნიორობის ლოკალურ პროგრამას. ეს არის მნიშვნელოვანი წინ გადადგმული ნაბიჯი მმართველობის გამჭვირვალეობის კუთხით. მე და ჩემი გუნდი მზად ვართ, ხელი შევუწყოთ მმართველობის სფეროში სამოქალაქო ჩართულობის გაზრდას და პარტნიორ არასამთავრობო ორგანიზაციებთან ერთად, საჯარო კონსულტაციების საფუძველზე შევიმუშაოთ და განვახორციელოთ OGP-ის სამოქმედო გეგმა,“ – განაცხადა ლადო ჯურხაძემ.
კონკურსის შესარჩევ ეტაპებზე მუნიციპალიტეტს აქტიურ მხარდაჭერას უწევდნენ ადგილობრივი არასამთავრობო ორგანიზაციები, „ხონის დევნილთა საინიციატივო ჯგუფი“ და რეგიონალური ინიციატივების ცენტრი „ნათელი მომავალი.“ სწორედ მათთან თანამშრომლობით იგეგმება სამომავლოდ ღია მმართველობის სამოქმედო გეგმის შემუშავება. „ხონის დევნილთა საინიციატივო ჯგუფი“ და რეგიონალური ინიციატივების ცენტრი „ნათელი მომავალი“ მიესალმებიან ხონის მუნიციპალიტეტის ლოკალურ პროგრამაში გაწევრიანებას და მზადყოფნას გამოხატავენ აქტიურად ჩაერთონ ადგილობრივ დონეზე OGP-ის ფორუმის მუშაობის პროცესში.
„მივესალმები ხონის მუნიციპალიტეტის OGP-ის ლოკალური პროგრამის წევრად არჩევას. მოხარული ვარ, რომ არასამთავრობო ორგანიზაცია „ხონის დევნილთა საინიციატივო ჯგუფი“ ამ ეტაპზეც აქტიურად არის ჩართული მმართველობის განხორციელების სფეროში და მუნიციპალიტეტისათვის საჭირო და სასარგებლო სამოქმედო გეგმის შემუშავების პროცესში მიიღებს მონაწილეობას,“ – აღნიშნა „ხონის დევნილთა საინიციატივო ჯგუფი“-ს ხელმძღვანელმა, ბაჩანა ბასილაიამ.
OGP-ის ლოკალური პროგრამის ახალი წევრები კონკურსის საფუძველზე შეირჩნენ, რომელიც 2020 წლის 26 მაისს გამოცხადდა და ორი ეტაპისგან შედგებოდა. მიღებული 112 განაცხადიდან, წინასწარ განსაზღვრული კრიტერიუმების საფუძველზე, შესარჩევმა კომისიამ 56 წევრი აირჩია, რომლებიც 32 ქვეყნის 64 ადგილობრივ თვითმმართველობას აერთიანებენ. აღნიშნული OGP-ის ისტორიაში თვითმმართველობების ჩართულობის ყველაზე მასშტაბური გაფართოებაა და ემთხვევა კრიტიკულ მომენტს, როცა ქალაქები და ადგილობრივი თვითმმართველობები COVID-19 პანდემიასთან ბრძოლის წინა ხაზებზე არიან.
ხონის მუნიციპალიტეტი კონკურსის ორივე ეტაპზე აქტიურად თანამშრომლობდა საქართველოს მთავრობის ადმინისტრაციასთან, როგორც ღია მმართველობა საქართველოს სამდივნოსთან და მონაწილეობა მიიღო სამდივნოს მიერ გამართულ საკონსულტაციო შეხვედრებში. მუნიციპალიტეტი მადლიერია კონკურსის განმავლობაში გაეროს განვითარების პროგრამის (UNDP) გულისხმიერი მხარდაჭერის
პარტნიორობამ ადგილობრივი თვითმმართველობების მხარდაჭერის სპეციალურ პროგრამას 2016 წელს ჩაუყარა საფუძველი. აღნიშნულ პროგრამაში 2016 წელსვე ჩაერთო და დღემდე აქტიურად მონაწილეობს ქალაქ თბილისის მერია. დედაქალაქი პირველ 15 თვითმმართველ ქალაქს შორის მოხვდა, რომელიც მსოფლიოს მასშტაბით 45 კანდიდატიდან შეირჩა.
.„ღია მმართველობის პარტნიორობა“ (OGP) აშშ-ისა და ბრაზილიის პრეზიდენტების ინიციატივით 2011 წელს დაფუძნდა. ორგანიზაცია მიზნად ისახავს მთავრობათა გამჭვირვალობის, ანგარიშვალდებულებისა და ეფექტიანობის გაზრდას. საქართველო ერთ-ერთი პირველი ქვეყანა იყო, რომელიც OGP-ს 2011 წელს შეუერთდა. OGP ამჟამად მსოფლიოს ორასამდე ქვეყნის მთავრობის, ადგილობრივი თვითმმართველობისა და სამოქალაქო საზოგადოების წარმომადგენლებს აერთიანებს.
