წყალტუბოში Hilton-ის ბრენდის სასტუმრო 1.5 წელში გაიხსნება – ამის შესახებ BMG-ს ინვესტორმა ჯამათა ჩარკვიანმა განუცხადა. მისი თქმით, ამ ეტაპზე კომპანია „აკა ჰოლდინგი“ საფასადე და ეზოს მოწყობით სამუშაოებს ასრულებს.
პროექტის ფარგლებში კომპანია18 მლნ ევროს დახარჯავს.
საუბარია 122 ნომრიანი სასტუმროს მშენებლობაზე, რომელიც ლუქსის, საპრეზიდენტო და სტანდარტულ ნომრებს გააერთიანებს.
„დაახლოებით 1-1.5 წელი კიდევ გვჭირდება. იცით, რომ დეტალები არ თანხმდება საქართველოში, არამედ ბრიტანეთში რასაც გარკვეული ვადები სჭირდება.
ცვლილებები არ გაქვს. საუბარია 122 ნომრიანი სასტუმროს მშენებლობაზე ყველა საჭირო ინფრასტრუქტურით. მიუხედავად ზოგადად ფასების ზრდისა, მისი სიანვეტიციო ღირებულება არ გაგვზრდია, რადგან პროექტი თავად „ჰილტონის“ მიერ მეტობით იყო დაანგარიშებული.
ამ ეტაპზე ფასადზე და ეზოზე მიდის მუშაობა. შენობის უკანა მხარემ ვერ გაუძლო სამუშაოებს და ის იცვლება, ასევე მიდგმული შენობა ჩანაცვლდება ახლით.“ – განაცხადა ჩარკვიანმა.
შეგახსენებთ, წყალტუბოში სახელმწიფო პროგრამა „წყალტუბოს ახალი სიცოცხლის“ ფარგლებში გაყიდული სანატორიუმ „თბილისი“კომპანია „აკა ჰოლდინგმა“ სახელმწიფოსგან 3.152 მლნ ლარად 2022 წლის აგვისტოში შეიძინა.
კომპანიამ, რომლის ძირითადი პროფილი საცხოვრებელი ბინების დეველოპმენტია, სახელმწიფო ქონების შეძენით, წყალტუბოში 2023 წლის 1 იანვრიდან არაუგვიანეს 55 თვის ვადაში, არანაკლებ 110-ნომრიანი სასტუმროს მოწყობის და ამისთვის მინიმუმ 9 426 900 ლარის ინვესტიციის ვალდებულება აიღო.
