იმერეთში სათევზაო მეურნეობისთვის საჭირო ტერიტორიები ბევრია, თუმცა მათი გამოყენება ვერ ხდება, შესაბამისად, მესაკუთრეები მის გასხვისებაზე ფიქრობენ. ამის შესახებ შპს „ბაში 2006“-ის თანადამფუძნებელმა ირაკლი სულაქველიძემ “ბიზნესპრესნიუსთან” საუბრისას განაცხადა.
ეს არის სათევზაო მეურნეობა, რომელიც, 2006 წელს დაფუძნდა, თუმცა, ამ დროისთვის ბიზნეს საქმიანობა გაჩერებული აქვს.
როგორც ირაკლი სულაქველიძე ამბობს, სათევზაო ტურიზმის განვითარების კუთხით, ქვეყანას დიდი პოტენციალი აქვს, თუმცა, ხელისშემწყობი ფაქტორების ნაკლებობაა. კერძოდ, მისი თქმით, საქართველოს კანონმდებლობთ, სასოფლო სამეურნეო დანიშნულების მიწის ნაკვეთზე, აკრძალულია უცხოელი ინვესტორის შემოყვანა, სახელმწიფოს კი დამხმარე პროექტები არ აქვს. შესაბამისად რესურსი, რომელიც არსებობს, გამოუყენებელი რჩება.
„ჩვენი სათევზაო მეურნეობა არის სამტრედიის რაიონში. ეს არის სოფელი ბაში, ქუთაისის აეროპორტის მოპირდაპირე მხარეს. ეს იყო გრძელვადიანი იჯარა, რომელიც 2006 წელს 5-მა მეწილემ გამოვისყიდეთ. ეს ადგილი მოიცავს 4 ტბას, ჯამში არის 160 000 კვ.მ. თავიდან ძალიან კარგად დავიწყეთ მუშაობა. დავსახეთ ბიზნეს გეგმა, გვინდოდა გაგვეკეთებინა, როგორც სათევზაო ტურიზმისთვის განკუთვნილი მეურნეობა, ვაპირებდით, იმერული ოდების ჩადგმას, თავისი საპიკნიკე ადგილებით და შესაბამისი ინფრასტრუქტურით. უცხოელი ტურისტების მოზიდვა გვქონდა გეგმაში, მაგრამ 2008 წელს, როდესაც ომი დაიწყო, წავიდა ეკონომიკური კრიზისი, ბანკებმა შეაჩერეს ყველანაირი დაფინანსება და ჩვენი პროექტიც გაჩერდა.
გვაქვს მხოლოდ ტბები, თუმცა რომ არ დაჭაობდეს, წყლისგან დავცალეთ, როგორც კი გამოჩნდება ვარიანტი, რომ სათევზაო ტურიზმით ვინმე დაინტერესდება, ჩვენ შეგვიძლია დავაწყოთ ამ აუზების შევსება, 4 ტბაა, თითო 40 000 კვ.მ თევზსაც მოვაშენებთ ძალიან მარტივად. თავიდან, 4-5 სახის თევზი გვყავდა გაშვებული.
ჩვენ ინტენსიურად ვაკვირდებოდით სოფლის მეურნეობის სამინისტროს პროექტებს, რომ იქნებ რამე საჩვენო გამოჩნდეს, მაგრამ სათევზაო ტურიზმთან დაკავშირებით არაფერი ყოფილა. მხოლოდ საკალმახეებზე იყო.
რაც შეეხება კერძო ინვესტორებს, უცხოელებიდან იყო წამოსული დაინტერესება, მაგრამ საქართველოს კანონმდებლობით, სასოფლო-სამეურნეო დანიშნულების მიწის ნაკვეთები უცხოელზე არ გაიყიდება და ვერც წილში შემოიყვან უცხოელს. ამ ფაქტორმა ძალიან შეგვიშალა ხელი, თორემ ძალიან საინტერესო შემოთავაზებები იყო გერმანიის, თურქეთის, ირანის მოქალაქეების მხრიდან, მაგრამ წილში ვერ შემოვიყვანეთ. არადა, ძალიან პერსპექტიული საქმიანობაა, გერმანელების მხრიდან იყო დიდი დაინტერესება სათევზაო ტურიზმთან დაკავშირებით. როგორც ვიცი, ევროკავშირის ქვეყნებში ეს ძალიან ძვირია, თან ქუთაისის აეროპორტიდან პირდაპირი ფრენებია და მოსახერხებელი ადგილია.
ძალიან დიდი პოტენციალი იკარგება, იმერეთში თევზის მეურნეობისთვის საჭირო ტერიტორიები ძალიან ბევრია, მაგრამ ყველა ცდილობს გაყიდოს. იმიტომ, რომ ვერ მართავენ, ფინანსები არ აქვთ. სახელმწიფოსგან ძალიან გჭირდება ხელის შეწყობა. არ უნდა ვიყოთ დამოკიდებული უცხო ქვეყნიდან ზღვის პროდუქტების იმპორტზე. ასეთი მეურნეობების ჩამოყალიბება ძალიან განავითარებდა სექტორს. თუნდაც საგრანტო კონკურსები რომ ყოფილიყო, ესეც დიდი ხელშეწყობა იქნებოდა“,- ამბობს ირაკლი სულაქველიძე.
