ორსულები მაღალ რისკჯგუფს მიეკუთვნებიან, ყველა უნდა აიცრას, არ დაუჯერონ, თუ ეტყვით რომ ვაქცინაცია არ შეიძლება – თენგიზ ცერცვაძე ფეხმძიმე ქალებს აფრთხილებს
დღეს, 09:00 210
კიდევ ერთი რთული თვე, რომლის შემდეგაც ქვეყანაში ეპიდვითარება მნიშვნელოვნად უნდა გაუმჯობესდეს – ასეთია ჯანდაცვის სფეროს წარმომადგენლების პროგნოზი. მედიკოსები თვლიან, რომ პანდემიის დამარცხების ერთადერთი გზა ვაქცინაციაა და ორსულებს მოუწოდებენ, რომ იმუნიზაციის პროცესში აქტიურად ჩაერთონ.
ინფექციური პათოლოგიის და შიდსის ცენტრის გენერალური დირექტორი თენგიზ ცერცვაძე აცხადებს, რომ ორსულები მაღალი რისკის ჯგუფს მიეკუთვნებიან და ისევე როგორც ასაკისა და თანმხლები დაავადების მქონე პირები, უკლებლივ ყველა ორსულიც უნდა ჩაერთოს ვაქცინაციის პროცესში.
“ყველა ორსულმა უკლებლივ აუცილებლად უნდა ჩაიტაროს ვაქცინაცია. თუ ყველა ადამიანმა უნდა ჩაიტაროს, განსაკუთრებით იმათმა, ვისაც ასაკის ან თანმხლები დაავადების გამო მიეკუთვნება მაღალი რისკის ჯგუფს, აი ამ კატეგორიაში გადის ორსულებიც. მათაც პირველ რიგში ყველამ უნდა ჩაიტაროს ვაქცინაცია და კატეგორიულად ვაცხადებ, რომ არ დაუჯერონ თუ ვინმე ვაქცინაციის პუნქტში მას ეტყვის, რომ ორსულების გამო ვაქცინაცია წინააღმდეგ ნაჩვენებია,” – განაცხადა თენგიზ ცერცვაძემ.
სპეციალისტები მოსახლეობას კიდევ ერთხელ აფრთხილებენ, რომ პირბადისა და სოციალური დისტანციის გარეშე ვირუსს ვერ დავამარცხებთ.
“აქტიურად მიდის ჩვენს ქვეყანაში ვაქცინაციის პროცესი, თუმცა კიდევ უფრო მეტი რიცხვი უნდა იყოს ყოველდღიურად ჩართული ამ პროცესში, რომ მოხდეს მაქსიმალურად სწრაფად იმუნური ფენის მიღება პანდემიის დასასრულისთვის. რაც უფრო მეტი ვაქცინირებული პირი იქნება ჩვენს ქვეყანაში და ზოგადად მსოფლიოში, მუტაციის განვითარების ალბათობა შემცირდება. რეკომენდაციები რაც არის – ნიღბის გამოყენება, დისტანცია, პირადი ჰიგიენა, თავშეყრისგან თავის შეკავება, ეს ისევ და ისევ რჩება უმნიშვნელოვანეს რეკომენდაციებად,” – აცხადებს აკადემიკოს ვახტანგ ბოჭორიშვილის სახელობის კლინიკის ინფექციონისტი მეგი კობახიძე.
