ჩემი ოცნება ავიხდინე – ქუთაისში ხელნაკეთი აქსესუარების მაღაზია-სახელოსნო გაიხსნა.
“ტასიკოს სახელოსნო” დიზაინერმა ელისო გეგენავამ საკუთარი ხელითა და მეგობრების დახმარებით შექმნა. სახელოსნო-მაღაზიაში, რომელიც აკაკი წერეთლის #8-ში მდებარეობს შეგიძლიათ სხვადასხვა ხელნაკეთი ნივთები, ტანსაცმელი და აქსესუარები შეიძინოთ. როგორც დიზაინერი ამბობს, სახელოსნოში მსურველები ქსოვის შესწავლას შეძლებენ.
მისივე თქმით ასევე იგეგმება მასტერკლასების ჩატარება ქსოვაზე, სამკაულების აწყობაზე, ქარგვაზე, საახალწლო სათამაშოების გაკეთებასა და ა.შ
“ყველაფერი გავაკეთეთ მე და ჩემმა მეგობრებმა, ერთობლივად. 7 სექტემბერს დავიწყეთ და დღეს გავხსენით. პირველად ვაკეთებდით ამ ყველაფერს, პირველად ვღებავდით, პირველად ტიხარს ვაკეთებდით და მემგონი მშვენიერი გამოვიდა. ხელნაკეთი ნივთების შეძენა შეიძლება, ასევე მასტერკლასები ჩატარდება საახალწლო სათამაშოებზე, დეკუპაჟზე, ქსოვა, ქარგვა, არტ თერაპიიის ერთ-ერთი კუთხე იქნება. ვისაც სურვილი ექნება საღამოს, სამსახურის შემდეგ, შეუძლია მოვიდეს, გარკვეულ თანხად დაჯდეს, მოქსოვის, მე კიდე ვასწავლი რა უნდა მოქსოვოს.
ეს სივრცე იყო ჩემი ოცნება და ეს ოცნება ავიხდინე, სხვათაშორის ქუთაისის დახმარებით.” – ამბობს დიზაინერი ელისო გეგენავა.
