საქართველო ოსკარზე რეჟისორ დიტო ცინცაძის ფილმს – „შინდისი“ წარადგენს.
გადაწყვეტილება რეჟისორების, დამდგმელი მხატვრის, მსახიობების, პროდიუსერებისა და კინო კრიტიკოსებისგან დაკომპლექტებულმა 12 კაციანმა ჟიურიმ ფარული კენჭისყრის საფუძველზე მიიღო.
12-დან 10 ხმა ჟიურიმ სწორედ რომ “შინდისს” არგუნა. ტელეკომპანია “მეგა ტვ”-ის ჟურნალისტი ნანა თევდორაძე ფილმის “შინდისის” იდეისა და პროექტის ავტორს, მთავარ პროდიუსერს ედმონდ მინაშვილს ესაუბრა. როგორც მან განაცხადა ფილმი 2008 წლის რუსეთ-საქართველოს ომში დაღუპულ მეგობრის ხსოვნას მიუძღვნა, თუმცა ედმონდი ყველა გარდაცვლილი გმირის ოჯახში თავად ცხოვრობდა და ცდილობდა 21-ე საუკუნის გმირების შესახებ მეტი ინფორმაცია გაეგო.
ფილმს “შინდისი” წინ უსწრებდა 2 სრულმეტრაჟიანი ფილმი, რომელთა მეშვეობითაც გმირების სახელი სრულიად საქართველომ გაიგო. მოძიებულ მასალებზე დაყრდნობით ფილმის სცენარის იდეაც გაჩნდა, რომელზე მუშაობას 2 წელი დასჭირდა. ფილმის გადაღებები კი 27 დღეში დასრულდა. ფილმში მთავარ როლებს გოგა პიპინაშვილი და დათო ბახტაძე ასრულებენ. სხვა დეტალები კი 8 აგვისტოს დაანონსებულ ოფიციალურ პრესკომფერენციაზე გახდება ცნობილი.
“გამარჯვებული ფილმი საქართველოს განათლების, მეცნიერების, კულტურისა და სპორტის სამინისტროსა და ეროვნული კინოცენტრის მხარდაჭერით ოსკარის კამპანიაში ჩაერთვება და ამერიკის კინოაკადემიის საერთაშორისო სრულმეტრაჟიანი ფილმის ნომინაციაში მოსახვედრად იბრძოლებს.” – აცხადებენ განათლების, მეცნიერების, კულტურის და სპორტის სამინისტროში.
