საქართველოს პარლამენტმა დაჩქარებული წესით, მესამე მოსმენით დაამტკიცა საკანონმდებლო პაკეტი, რომელიც კაზინოებს საერთაშორისო ტურნირების მოწყობისთვის საგადასახადო შეღავათებს უწესებს. კანონპროექტს მხარი დაუჭირა 73-მა დეპუტატმა, 5 კი წინააღმდეგი იყო. ცვლილება ქართული ოცნების დეპუტატების მიერ იყო ინიცირებული, მათ შორის მისი თანაავტორია პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილი და ამავე კომიტეტის სხვა წევრები.
საკანონმდებლო პაკეტის განხილვა პარლამენტში 26 ოქტომბერს დაიწყო და პირველი, მეორე და მესამე მოსმენით 27-28 ოქტომბერს დამტკიცდა.
შოთა ბერეკაშვილის განმარტებით, დაჩქარებული განხილვის მიზეზი ისაა, რომ კანონპროექტი კაზინოში სტანდარტულ აზარტულ თამაშებს კი არა, საერთაშორისო ტურნირებს ეხება. მისი თქმით, ცვლილებების მიზანი საქართველოში უცხოელი ვიზიტორების მოზიდვა და ტურისტული სექტორის, განსაკუთრებით არასეზონურ პერიოდში, გააქტიურებაა.
- საერთაშორისო ტურნირის დეფინიცია: კანონპროექტით, ასეთად ჩაითვლება თამაშობა, რომელშიც მონაწილეთა სულ მცირე 70% უცხო ქვეყნის მოქალაქე იქნება. [ ეს დათქმა მეორე მოსმენისთვის შეიცვალა და უცხოელების მონაწილეობის წილი 80%-მდე გაიზარდა].
- საგადასახადო შეღავათი: თუ ორგანიზატორი კლუბის მაგიდას მხოლოდ საერთაშორისო ტურნირისთვის გამოიყენებს და საპრიზო ფონდი 3 მილიონ ლარს გადააჭარბებს, ის სათამაშო ბიზნესის მოსაკრებლისგან გათავისუფლდება.
ინიციატივასთან დაკავშირებით კითხვები 26 ოქტომბერსვე დააფიქსირეს პარლამენტის ოპოზიციური პარტიის – “გახარია საქართველოსთვის” წევრებმა, დღეს კი საკითხზე საკუთარი კრიტიკული პოზიცია დააფიქსირა საქართველოს საპატრიარქომაც. საქართველოს საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე ახალ ცვლილებებს ეხმაურება, მისი განცხადებით, აღნიშნული საკანონმდებლო პაკეტი საპატრიარქოსთვის სრულიად მოულოდნელი აღმოჩნდა, რადგან ხელისუფლებას მათთან წინასწარი კომუნიკაცია არ ჰქონია.
რა შეიცვალა ამ საკანონმდებლო პაკეტით:
ცვლილება შევიდა ექვს სხვადასხვა კანონში, მათ შორის საგადასახადო კოდექსში, ასევე ლიცენზიების და ნებართვების შესახებ კანონში, სათამაშო ბიზნესის მოსაკრებლის შესახებ კანონსა და ლატარიების და აზარტული თამაშების მოწყობის შესახებ კანონში.
კანონპროექტის მიხედვით, საერთაშორისო აზარტული ტურნირის ჩატარებას მხოლოდ სამორინეს მოწყობის ნებართვის მფლობელი შეძლებს. ტურნირში მონაწილეთა სულ მცირე 80% უცხო ქვეყნის მოქალაქე უნდა იყოს. ღონისძიების ორგანიზებისთვის ცალკე ნებართვა იქნება საჭირო, რომლის წლიური სანებართვო მოსაკრებელი 100 000 ლარს შეადგენს.
სათამაშო ბიზნესის მოსაკრებლისგან გათავისუფლება იმ შემთხვევაში იქნება შესაძლებელი, თუ კაზინო კლუბის მაგიდას მხოლოდ საერთაშორისო აზარტული ტურნირის ჩასატარებლად გამოიყენებს და ღონისძიების საპრიზო ფონდი 3 მილიონ ლარს გადააჭარბებს. მოქმედი განაკვეთით, კლუბის თითოეულ მაგიდაზე სათამაშო ბიზნესის მოსაკრებელი კვარტალში 4 000-დან 14 000 ლარამდეა. თუ ტურნირის საპრიზო ფონდი 3 მილიონ ლარს არ აღემატება ან მაგიდა მხოლოდ ასეთი ღონისძიებისთვის არ გამოიყენება, მოსაკრებლის გადახდის ვალდებულება შენარჩუნდება.
საგადასახადო კოდექსში დაგეგმილი ცვლილების თანახმად, 3 მილიონ ლარზე მეტი საპრიზო ფონდის მქონე საერთაშორისო აზარტულ ტურნირში უცხო ქვეყნის მოქალაქეების მიერ მიღებული შემოსავალი საშემოსავლო გადასახადისგან გათავისუფლდება. სხვა ფიზიკური პირების მიერ მიღებული დასაბეგრი შემოსავალი კი 20%-ით დაიბეგრება.
საკანონმდებლო პაკეტი სანქციებსაც ითვალისწინებს. საერთაშორისო ტურნირის მოწყობის სანებართვო პირობების დარღვევისთვის ჯარიმა 50 000 ლარი იქნება, ხოლო შესაბამისი ნებართვის გარეშე ტურნირის ორგანიზება ან ჩატარება 150 000 ლარის ოდენობით დაჯარიმებას გამოიწვევს. სანებართვო პირობების შეუსრულებლობის შემთხვევაში ნებართვა შესაძლოა გაუქმდეს.
