დღეს გადაცემის ‘შუადღე ქუთაისში’ სტუმარი გახლდათ ცხოველთა დაცვის ფედერაციის წარმომადგენელი თემურ ლაჭყეპიანი, გადაცემის თემა კი მიუსაფარ ცხოველთა მძიმე ყოფა ჩვენს ქვეყანაში. როგორც სტუმარმა აღნიშნა სახელმწიფო ამ მიმართულებით სათანადო დონეზე ვერ მუშაობს და დღესაც ქვეყანაში მიუსაფარი ცუგების ბედი კეთილი ადამიანების ხელშია:
“სახელმწიფო მინიმალურ დონეზე ახორციელებს იმას რასაც უნდა ახორციელებდეს. ვგულისხმობ სტერილიზაციას, კასტრაციას , უფრო მეტი რაოდენობით უნდა ხდებოდეს. ამასთან უნდა იყოს არამხოლოდ პოპულაციის მართვა, სახელმწიფო უნდა ერთვებოდეს საზოგადოების ცნობიერების ამაღლებაში, საკანონმდებლო ბაზის დახვეწაში.
უნდა მოხდეს ასევე ამსობრივი აღრიცხვიანობა ჩიპირების მეთოდით , იქნებიან ეს ცხოველები ჩიპირებული და როდესაც ისინი აღმოჩნდებიან ქუჩაში ამაზე უნდა იყოს ძალიან მაღალი სანქცია ან შეიძლება უფრო რთულიც-სისხლის სამართლის დანაშაულიც რომ იყოს კარგი იქნებოდა, იმიტომ რომ შიში ექნებოდა მოქალაქეებს და არ გამოაგდებდნენ თავიანთ ცხოველებს ქუჩაში.
ანუ ამ ყველაფრის რეგულირებას უნდა ახორციელებდეს სახელმწიფო. სახელმწიფო კი ამას არეგულირებს მინიმალურ დონეზე. თბილისში არის ცხოველთა პოპულაციის მართვის წესი , რომელიც ითვალისწინებს დასანქცირებას, თუმცა ეს არის მინიმალური ჯარიმა. ქუთაისში არ არის იგივე წესი სამწუხაროდ, საკრებულოს არ დაუმტკიცებია, რომელიც დააჯარიმებდა მეპატრონეს. ჩვენმა ორგანიზაციამ რამოდენიმეჯერ შევიტანეთ საკრებულოში ასეთი ინიციატივა, რომ მიეღოთ ეს წესი და თუნდაც მინიმალური ჯარიმა მაინც ყოფილიყო მუნიციპალურ დონეზე და ეს საკრებულომ არ დაამტკიცა.”