ეკონომიკისა და მდგრადი განვითარების მინისტრი ნათია თურნავა აცხადებს, რომ რიყის დოქების საბაზრო ღირებულება განისაზღვრება და ეს ობიექტი აუცილებლად დაიტვირთება.
აღსანიშნავია, რომ რიყის დოქები აუქციონზე უკვე ორჯერ გავიდა, თუმცა უშედეგოდ. ობიექტის საწყისი ღირებულება პირველ ჯერზე 95 მლნ ლარი, ხოლო მეორე ჯერზე 75 მლნ ლარი იყო, თუმცა მისი ყიდვის მსურველი არ გამოჩნდა.
ნათია თურნავა განმარტავს, რომ თავის დროზე შენობის ასაშენებლად ხალხის ფული დაიხარჯა, თან არაადეკვატურად ბევრი, ამიტომ კანონმდებლობით, სახელმწიფო ვალდებულია, ლოტის გაყიდვა თვითღირებულებაზე მეტი თანხიდან დაიწყოს და საბაზრო ფასამდე ასე მივიდეს.
„გვაქვს გარკვეული ობიექტები, რომლებიც თავის დროზე, წინა ხელისუფლების დროს აშენდა და არაეალურად მაღალი, გაბერილი თანხებია დახარჯული მათ აშენებაში. კანონმდებლობით ვალდებულები გვაქვს, რომ საწყისი ღირებულება დავიწყოთ იმ თანხით, რაც თავის დროზე დაჯდა. რიყის დოქებიც არ დარჩება გაუსხვისებელი, რადგან იმთავითვე ჩანს, რომ ის თანხები საბაზრო კონიუნქტურას იმთავითვე არ შეესაბამებოდა. თამამად ვივლით ამ მიმართულებით და თუ ვხედავთ, რომ დღეს თანხა არარეალურია, გადავხედავთ. ეს პრაქტიკა უკვე გამოვიყენეთ სხვა ობიექტებთან მიმართებაში. იგივე გეგმა გვაქვს რიყის დოქებთან მიმართებაში“, – განაცხადა ნათია თურნავამ.
რაც შეეხება სახელმწიფო საწარმოების პრივატიზაციას, ნათია თურნავას განცხადებით, პირველივე აუქციონზე 109 ობიექტი გასხვისდა.
„ვერავის დავეთანხმებით იმაში, რომ ობიექტები არ იყიდება. პირველივე აუქციონზე 109 ობიექტი გაიყიდა და ისეთი ძლიერი ინტერესი იყო, რომ კონკურენციის შედეგად ჯამში 41 მლნ საწყისი ღირებულება ავიდა 60 მლნ-მდე. ეს იმას ნიშნავს, რომ თითო ობიექტზე იყო უმეტესად ერთზე მეტი დაინტერესებული პირი, ანუ 109 ობიექტის გაყიდვა პირველ ორ კვირაში არის ძალიან კარგი შედეგი“, – აღნიშნა მან.
