რიონის ხეობის მცველები, ამ წუთებში მსვლელობით სოფელ გუმათის ცენტრში გადავიდნენ. აქციის ორგანიზატორები არ ამბობენ, თუ ვის გამო მიიღეს აღნიშნული გადაწყვეტილება.
თუმცა, ხეობაში ულტრამემარჯვენე რადიკალური ჯგუფის “ქართული მარშის” წევრები იმყოფებიან. გარდა ამისა, რიონის ხეობაში ჩავიდა Facebook ბლოგერი, დომენიკ მანგო, რომელიც “ქართულ მარშთან” დაპირისპირებულია. სავარაუდოდ, არსებობს იმის რისკები რომ დაპირისპირებულ მხარეებს შორის მოხდეს სიტუაციის ესკალაცია და სწორედ ეს გახდა რიონის ხეობის მცველების გუმათის ცენტრში გადანაცვლების მიზეზი.
მანამდე, ვარლამ გოლეთიანმა განაცხადა, რომ რიონის ხეობის მცველები ყველანაირ ძალადობას ემიჯნებიან და იმ შემთხვევაში თუ მსგავს ფაქტს ექნება ადგილი, კარვის მხარეს გადავლენ, რათა არ მოხდეს პროვოკაციები.
“რამდენიმე ისეთი ჯგუფი იყრის თავს, რომლებსაც ისტორიული დაპირისპირება აქვთ ერთმანეთთან და შეიძლება ადგილზე დაიძაბოს ვითარება. ჩვენ არ გვინდა პოლიციამ გამოიყენოს ეს შანსი, დიდი ხანია ელოდებიან რაიმე მნიშვნელოვან პროვოკაციაზე წამოგვაგონ და ამით გაანეიტრალონ ჩვენი პროტესტი. ჩვენ მოვუწოდეთ სამხარეო პოლიციის უფროსსაც, რომ მიეღო შესაბამისი ზომები, მაგრამ თქვა, რომ არაფრის გაკეთებას არ აპირებენ. წინასწარ არანაირ კონსპირაციას არ ვავითარებთ, მაგრამ ვამბობთ, რომ თუ აქ ექნება შეხლა-შემოხლას ადგილი, ვემიჯნებით ყველანაირ ძალადობას. თუ მსგავს შემთხვევას ექნება ადგილი, ყველა გადავალთ კარვის მხარეს და ვისაც უნდა დაპირისპირება, მიეცემა ეს ასპარეზი ალბათ მათ ამისთვის. მოვუწოდებ ყველას, შეინარჩუნოს სიმშვიდე”, – თქვა ვარლამ გოლეთიანმა “რადიო თავისუფლებასთან”.