ქუთაისში, თაბუკაშვილის ქუჩის მცხოვრებლები მეტალურგიული ქარხანა „ჰერკულესის“ წინააღმდეგ გამოდიან. მათი თქმით, საწარმო გარემოს აბინძურებს, ხოლო ადგილობრივი მცხოვრებლები ფანჯრებს ვერ აღებენ, რადგან გამონაბოლქვი მათ კორპუსებში შედის.
როგორც თაბუკაშვილის ქუჩის მცხოვრებმა დარინა მუკბანიანმა აცხადებსა, აქ ცხოვრება ზაფხულში განსაკუთრებით აუტანელი ხდება.
„გაჭვარტლულია სახლები, ბავშვები ეზოში ვერ ჩადიან სათამაშოდ“,- აცხადებს მუკბანიანი.
მოსახლეობის თქმით, ქარხანას არ აქვს ფილტრები, რასაც ისინი გასულ წლებშიც აპროტესტებდნენ.
ქარხნის ხელმძღვანელობა კომენტარს არ აკეთებს.
მეტალურგიული ქარხანა „ჰერკულესი” ქუთაისში, 2009 წელს, ქართულ-ინდური ინვესტიციით გაიხსნა.
“ნიუპრესს” ინფორმაციით მეტალურგიულ ქარხნაში ინსპექტირება უკვე განხორციელდა. როგორც გარემოს დაცვის ზედამხედველობის დეპარტამენტში განაცხადეს, შემოწმება მოსახლეობის მიმართვის საფუძველზე განხორციელდა. მეტალურგიულ ქარხანა “ჰერკულესს” სახელი შეეცვალა და უკვე “ამბიკონ სტილსის” სახელით ფუნქციონირებს.
“გარემოსდაცვითი ზედამხედველობის დეპარტამენტის დასავლეთის რეგიონული სამმართველოს ინსპექტორებმა, ცხელ ხაზზე შემოსული შეტყობინებების საფუძველზე შპს “ამბიკონ სტილსი” ინსპექტირება განახორციელეს. ნორმებთან შესაბამისობის დადგენის მიზნით, აღებულია ატმოსფერული ჰაერის სინჯები. დარღვევის გამოვლენის შემთხვევაში, გატარდება კანონით გათვალისწინებული ღონისძიებები”- წერია დეპარტამენტის მიერ “ნიუპრესისათვის” მიწოდებულ ინფორმაციაში.
“ჩემო მეგობრებო , მეზობლებოო, თაბუკაშვილის ქუჩის მაცხოვრებლებო და მთლიანად ქუთაისლებოოო !!! გთხოვთ გააზიაროთ ეს ფოტო , ეს არის გამონაბოლქვი, რომელიც მეტალურგიული ქარხნიდან ამოდის 24 საათის განმავლობაში ! ეს კვამლი ხვდება ჩვენი და ჩვენი შვილების ფილტვებში და გადადის სისხლში, რაც იწვევს სისხლში რკინის მომატებას და ონკოლოგიური დაავადებების რისკს ზრდის !!! თითქმის ყველა საინფორმაციოს და მედიას მივწერე და არ გააშუქეს , გთხოვთ ყველამ იაქტიურეთ, მოვითხოვოთ ფილტრების დაყენება ! თქვენი შვილებისთვის მაინც გააკეთეთ ეს!” – ამის შესახებ ქარხნის მიმდებარე ტერიტორიაზე მცხოვრები ხათუნა ტყეშელაშვილი თავის ფეისბუკ გვერდზე წერდა.
