„პოლიტიკურ საბოტაჟს რუსეთის მხრიდან არ გამოვრიცხავ; „ლოქდაუნმა“ დიდწილად გადაფარა სასანქციო პოლიტიკა“ – ამის შესახებ „პალიტრანიუსის“ გადაცემაში „360 გრადუსი“ ანალიტიკოსმა გია ხუხაშვილმა ელექტროენერგიის წყვეტის მიზეზებზე საუბრისას განაცხადა.
როგორც მანვე აღნიშნა, რუსეთს ყველა ბერკეტი აქვს იმისთვის, რომ ნებისმიერ „საჭირო“ მომენტში, თუ რაღაც არ მოეწონა, საქართველოში „ლოქდაუნი“ მოაწყოს.
მისი თქმით, ქვეყნის მასშტაბით ელექტროენერგიის წყვეტა შესაძლოა, იყოს მოდელირება იმისა, რა მოხდება იმ შემთხვევაში, თუ საქართველო რუსეთთან მიმართებაში არ გააგრძელებს აქამდე არსებულ პოლიტიკას.
მოგეხსენებათ, რომ გუშინ სანქციები დაწესდა ევროკავშირის მხრიდან და სასანქციო სიაში შეყვანილია ქართული სუბიექტები – საუბარია არამხოლოდ ყულევზე, არამედ კრიპტობაზარზე მოვაჭრე კომპანიებზე, რომლებიც არანაკლებ სერიოზული საკითხია. გარდა ამისა, აშშ-ში გარკვეული საგამოძიებო პროცესი დაიწყო ჩინეთის და რუსეთის გავლენების თაობაზე საქართველოში.
„ეს შესაძლოა, იყო მოდელირება სიტუაციის, რა შეიძლება გველოდებოდეს“
ეს არის ის არგუმენტები, რითაც დასავლეთი აწარმოებს თავის პოლიტიკას საქართველოსთან მიმართებაში. სავსებით შესაძლებელია, რომ რუსეთმა ამის პარალელურად კონტრარგუმენტი დადო, რა ბერკეტები აქვს საქართველოში. სხვათა შორის, ზოგიერთი „ქართული ოცნების“ მხარდამჭერის კომენტარებში გამოჩნდა კიდეც ეს ყველაფერი, რომ, „აი, რა გველოდება, ჩაბნელდა და პანიკაში ჩავარდა ხალხი, ბომბები რომ ჩამოცვენილიყო რა მოხდებოდაო“ – ამაზე გაკეთდა მათი მხრიდან აქცენტები.
პოლიტიკურ საბოტაჟს რუსეთის მხრიდან არ გამოვრიცხავ. გარდა ამისა, „ლოქდაუნმა“ დიდწილად გადაფარა სასანქციო პოლიტიკა. პოლიტიკურ საბოტაჟს „ენგურზე“ ვერ გამოვრიცხავ და არამხოლოდ ენგურზე, შიდა სისტემებიც ძირითადად რუსეთის მხრიდან არის კონტროლირებადი. რუსეთს ყველა ბერკეტი აქვს, რომ ნებისმიერ საჭირო მომენტში, თუ რაღაც არ მოეწონათ, საქართველოში „ლოქდაუნი“ მოაწყოს. ეს არის იმ დანაშაულებრივი პოლიტიკის შედეგი, რასაც ატარებს ხელისუფლება.
ეს შესაძლოა, იყო მოდელირება სიტუაციის, რა შეიძლება გველოდებოდეს, თუ არ გავაგრძელებთ რუსეთთან იგივე პოლიტიკას, რასაც დღემდე ვაწარმოებთ. ამას ვამბობ იქიდან გამომდინარე, რომ 24 საათის განმავლობაში ხელისუფლება არაფერს გვეუბნება, ეს იმას ნიშნავს, რომ მიზეზი პოლიტიკურად არაკომფორტულია ხელისუფლებისთვის სალაპარაკოდ“, – განაცხადა გია ხუხაშვილმა.
ცნობისთვის, 24 და 25 ივლისს, ქვეყნის ენერგოსისტემაში განვითარებულმა სასისტემო ავარიულმა გათიშვამ ელექტროენერგიისა და სატელეკომუნიკაციო ქსელების შეფერხება გამოიწვია. შედეგად, თბილისსა და საქართველოს უმეტეს რეგიონში დროებით შეწყდა ელექტროენერგიის მიწოდება.
დღეს “ენგურჰესის” დირექტორმა, ლევან მებონია განაცხადა, რომ ელექტროენერგიის მასშტაბური გათიშვა “იმერეთის“ 500 კილოვატიანი ხაზის გამორთვამ გამოიწვია.
პარალელურად, სახელმწიფო უსაფრთხოების სამსახურმდა გამოძიება საბოტაჟის მუხლით დაიწყო. გამომწვევი მიზეზების შესვლა ასევე დაიწყო სემეკმა.
