ხულოს სოფელ ხიხაძირში 5 სულიანი ოჯახი დახმარებას ითხოვს. სოციალურად დაუცველის სტატუსის მქონე ოჯახს გასული წლის დეკემბერში ძლიერმა ქარმა 100 წლის წინ აგებული, ერთადერთი საცხოვრებელი სახლი დაუნგრია. მიმდინარე წლის იანვრიდან კი მეზობლის სახლში 1 ოთახში უწევთ შეკედლება.
როგოც “მეგა ტვ”-ს ნატალია კახაბრიშვილი უყვება, მათ დანგრეული სახლიდან მხოლოდ საყოფაცხოვრებო ნივთების გამოტანა შეძლეს. ხულოს მერიიდან კი მათ ოჯახში მხოლოდ ერთხელ იყვნენ მისულები.
“სახლი რომ დაგვენგრა 2 ბოთლი ზეთი, 5 კილო ფქვილი, 3 კილო შაქარი, 5 კილო წიწიბურა, 3 კილო მაკარონი და 3 კილო ბრინჯი მოგვიტანეს. მთელი ზამთარი სიცივესა და უბედურებაში გავატარეთ. სააღდგომოდ კვერცხიც კი არ გვქონდა რომ შეგვეღება, დეკემბის შემდეგ არავინ მოსულა ჩვენს დასახმარებლად. ჩვენ მხოლოდ ნორმალურ საცხოვრებელ პირობებს ვითხოვთ.” – ამბობს ნატალია “მეგა ტვ”-თან საუბრისას.
როგორც დაზარებულმა “მეგა ტვ”-ს განუცხადა მეზობლის სახლში ერთ ოთახში ახალგაზრდა ცოლ-ქმარი, 8 წლის შვილი, ბებია და მაზლიშვილი ცხოვრებენ. ოჯახის უხუცესი წევრი უსინათლო და დიაბეტიანია. ისინი ძირითადად სოფლის მეურნეობის პროდუქციასა და სოციალურ დახმარებაზე არიან დამოკიდებულნი. ოჯახის დახმარებას თავისი პენსიით მოხუცი ქალიც ცდილობს.
გაბაიძეებმა მალე შესაძლოა დროებითი საცხოვრებელიც დაკარგონ, რადგან ფართის მფლობელი სოფელში სეზონურად ბრუნდება. ოჯახი ნორმალური საცხოვრებელი პირობებით უზრუნველყოფას უკვე მეოთხე თვეა უშედეგოდ ითხოვს.
ადგილობრივი თვითმმართველობა მათ, სახლების შესყიდვის პროგრამაში მონაწილეობის მიღებას სთავაზობს, მანამ კი ქირით უნდა უზრუნველყონ, თუმცა პროცესი დროში გაიწელა. ამის მიზეზად თვითმმართველობა პროგრამის ახლახან ამოქმედებას ასახელებს. როგორც აჭარის საზოგადოებრივი მაუწყებლის ეთერში ხულოს მერის მოადგილემ ნადიმ ვასაძემ განაცხადა თუ იმ ფართის მფლობელი, რომელშიც გაბაიძეები არიან შესახლებული, დაბრუნდება და ოჯახი ღია ცის ქვეშ დარჩება მათ საცხოვრებლად ქირით გადაიყვანენ.
ამ განცხადების შემდეგ 1 თვეზე მეტია გასული, გაბაიძეების ოჯახი კვლავ უკიდურეს გაჭირვებასა და გაუსაძლის მოლოდინში აგრძელებს ცხოვრებას.
დახმარების მსურველებმა შეგიძლიათ გელა გაბაიძეს ნომერზე 555 61 15 61 დაუკავშირდეთ.
