რუსთავში, მეგობრობის გამზირის N23 და N27 კორპუსის მცხოვრებლები დახმარებას ითხოვენ.
როგორც საინფორმაციო სააგენტო “ინფო რუსთავს” კორპუსის ერთ-ერთმა მცხოვრებმა განუცხადა, უკვე წლებია საკანალიზაციო სისტემის პრობლემა აწუხებთ, ბოლო თვებში კი, საკანალიზაციო მასა მიწის ზედაპირზე ამოდის და როგორც სარდაფებს, ასევე ლიფტებს ტბორავს.
“დიდი პრობლემაა, რომ ორი ბინა ერთ საკანალიზაციო სისტემაზე ზის და პლუს უკან დასვეს ოთხი კომერციული შენობა. ეს ცხიმები ჩამოდის შუაში, იჭედება, ამოდის მიწის ზედაპირზე და წინიდან შედის სარდაფებში. მერიის დიდი ძალისხმევით უკან დრენაჟის პრობლემა მოიხსნა, ჩვენთან აღარ არის წყალი, მაგრამ 23-ში არის კატასტორფული მდგომარეობა. ლიფტებში ამ ეტაპზე ჩვენს კორპუსში არ შედის, მაგრამ 23-ში ერთი წელია ლიფტი არ მუშაობს. დრენაჟიც გააკეთეს, მაგრამ კანალიზაციის გადამკიდე უკვე წინიდან შედის წყალი, უკნიდან აღმოიფხვრა, თუმცა ეს აღარ არის საკმარისი. პრობლემა არის ეს ოთხი შენობა, წვრილი დამაკავშირებელი სისტემა აქვს, ვეღარ ასწრებს გასვლას და ამოდის მთლიანად. რუსთავის წყალი, მერია, კორპუსი – ყველა საქმის კურსშია. იწმინდება, ორ დღეში ისევ იგივე მდგომარეობაა. გვჭირდება შუამდგომლობა, რომ გაკეთდეს, ამ ორი ბინის სისტემა. 60 წელია, რაც გაკეთებულია და რაც ეს 4 შენობა დასვეს, ვეღარ ასრულებს საქმეს. ზაფხული მოდის და ეს ყველაფერი პრობლემებს უქმნის როგორც ზრდასრულბს, ისე ბავშვებს”, – აცხადებს მეგობრობის N27 კორპუსის მცხოვრები.
თემასთან დაკავშირებით კომპანია “ჯორჯიან უოთერ ენდ ფაუერს” დაუკავშირდით. კომპანიაში აცხადებენ, რომ საკითხი დღის წესრიგში დგას და აღნიშნული ქსელის რეაბილიტაცია იგეგმება.
“რადგან დგას უკვე პრობლემა მივლენ და ისევ გაუწმენდენ, ზოგადად ქსელის რეაბილიტაცია კი განხილვის პროცესშია, იგეგება”, – აცხადებენ კომპანიაში.
