“თქვენო აღმატებულებავ, ბატონო პრეზიდენტო!”-“პატრიოტთა ალიანსი” მომხრეებთან ერთად რუსეთის პრეზიდენტს ღია წერილით მიმართავს

“პატრიოტთა ალიანსის” ლიდერები ირმა ინაშვილი, დავით თარხან-მოურავი და სხვა პირები რუსეთის პრეზიდენტს ღია წერილით მიმართავენ.

წერილი ირმა ინაშვილმა facebook-ის საკუთარ გვერდზე დღეს გამოაქვეყნა. წერილი იწყება მიმართვით „თქვენო აღმატებულებავ, ბატონო პრეზიდენტო“

“თქვენო აღმატებულებავ, ბატონო პრეზიდენტო! მიიღეთ ჩვენი რწმუნებულება უმაღლეს პატივისცემაში და ნება მოგვეცით გამოვხატოთ ჩვენი მადლიერება თქვენდამი…

საქართველო და უკრაინა არ უნდა შევიდნენ ნატოში, საქართველომ უნდა გამოაცხადოს სამხედრო ნეიტრალიტეტი… საქართველოს ხელისუფლება რეგულარულად უთმობს ტერიტორიას, ეროვნული ინტერესების საწინააღმდეგოდ ნატოს სამხედრო წვრთნებისთვის, რაც რუსეთისთვის გამოწვევას წარმოადგენს… საქართველო არ არის დამოუკიდებელი, საქართველოს ხელისუფლების საშინაო დავალებაა ამერიკის ხელისუფლების ოფიციალური განცხადებები. ქართველ ხალხს არ უნდა ნატოში“.

მაშინაც თებერვალი იდგა, 1921 წელი, როდესაც სერგო ორჯონიკიძემ მოსკოვში დეპეშა გაუგზავნა ვლადიმერ ლენინსა და იოსებ სტალინს, რომელშიც ეწერა: “ლენინს. სტალინს. თბილისის თავზე საბჭოთა მთავრობის წითელი დროშა ფრიალებს. გაუმარჯოს საბჭოთა საქართველოს!”.

გავიდა ერთ საუკუნეზე მეტი და 2022 წლის 20 თებერვლის ეს წერილი იდენტური და შინაარსობრივად თანასწორია 1921 წლის 25 თებერვლის დეპეშისა.

ამ წერილის თითოეული ხელმომწერის გულებსა და გონებაში ნამდვილად ფრიალებს საბჭოთა წითელი და რუსული სამფეროვანი დროშები, მაგრამ საქართველოს თავზე აღარასდროს აფრიალდება არცერთი ეს დროშა, არამედ მოვიდა და მოდის თაობები, რომელთა უმრავლესობაში მეხუთე კოლონის მოღალატეობრივი სინდრომი არ არსებობს, ხოლო მოღალატეთა ხვედრი ისტორიის სანაგვეზე ყველაზე ბინძურ ადგილზეა.”-წერს ისტორიის დოქტორი ლაშა შარვაშიძე დეისაძე