როდესაც კალასი საუბრობს, რომ მისი ამოცანა არ არის საქართველოსა და შავი ზღვის საკითხების სიღრმისეული განხილვა, ეს აჩვენებს მის ზედაპირულობას – რაც შეეხება საქართველოს არ მიწვევას [ევროკავშირის გაფართოების ფორუმზე] ესეც აჩვენებს, თუ ვინ არის საქართველო-ევროკავშირს შორის ურთიერთობაში ბოიკოტზე ორიენტირებული, დესტრუქციული და დიალოგის შემაფერხებელი, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისივე თქმით, არ არსებობს დიდი სახელმწიფო, რომელიც ანგარიშს უწევს დღეს ევროკავშირს, როგორც გლობალურ ძალას.
„როდესაც კალასი საუბრობს, რომ მისი ამოცანა არ არის საქართველოსა და შავი ზღვის საკითხების სიღრმისეული განხილვა, აჩვენებს მის ზედაპირულობას. ის ამ სიღრმეებში არ შედის, იმიტომ, რომ არის ზედაპირული თავის საგარეო პოლიტიკაში. ეს ჩანს და ამიტომაც არის, რომ ევროკავშირის საგარეო პოლიტიკა დღეს უმწიფარია და მან თავისი გლობალური როლი დაკარგა. არ არსებობს დიდი სახელმწიფო, რომელიც ანგარიშს უწევს დღეს ევროკავშირს, როგორც გლობალურ ძალას.
რაც შეეხება საქართველოს არ მიწვევას [ევროკავშირის გაფართოების ფორუმზე] ესეც აჩვენებს, თუ ვინ არის საქართველო-ევროკავშირს შორის ურთიერთობაში ბოიკოტზე ორიენტირებული, დესტრუქციული და დიალოგის შემაფერხებელი. კარგად ჩანს, რომ ამ ურთიერთობაში დესტრუქციული არის ევროკავშირი, კონსტრუქციული კი საქართველოა.
მზად ვართ დაველოდოთ მათ დიალოგის მაგიდასთან. სადაც ევროკავშირი კონფრონტაციაზე წავიდა, თვითონაც წააგო და სხვა ქვეყნებს კიდევ უფრო დიდი შეცდომები დააშვებინა და დიდ უბედურებაში გადააგდო. არ ვფიქრობთ, რომ უნდა ავყვეთ ევროკავშირის კონფრონტაციულ პოლიტიკას. ჩვენ დიალოგის მაგიდასთან ვსხედვართ, ველოდებით როდის მოუსხდება ბრიუსელის წარმომადგენლობა ამ მაგიდას. ჩვენ ვართ კონსტრუქციული და დროა ევროკავშირი კონსტრუქციულ კალაპოტს დაუბრუნდეს“,- აღნიშნა პაპუაშვილმა.
ამასთან, პაპუაშვილმა უპასუხა კითხვას, როგორ შეაფასებს იმ ფაქტს, რომ ნოემბერში დაგეგმილ გაფართოების კონფერენციაზე, სადაც საქართველოდან მხოლოდ ნინო ლომჯარიაა მიწვეული, მაშინ როდესაც გაფართოებაზე სასაუბროდ სახელმწიფოები არიან წარმოდგენილი.
„ნინო ლომჯარია იყო 2024 წელს საქართველოს არჩევნებზე ბრიუსელის მხრიდან ჰიბრიდული თავდასხმის და ჩარევის იარაღი. ფინანსდებოდა სხვადასხვა ევროპული ფონდიდან, რომ გარედან მომხდარიყო ჩარევა არჩევნებში. დეზინფორმაციას ავრცელებდა არჩევნებთან დაკავშირებით და როგორც სახალხო დამცველი, ტყუილს ამბობდა სააკაშვილის ჯანმრთელობასთან დაკავშირებით. ნინო ლომჯარია საქართველოზე ჰიბრიდული თავდასხმის იარაღი იყო და თავის იარაღს ალბათ მიიწვევენ იმისთვის, რომ კიდევ ერთხელ გაამზადონ… ეს ადასტურებს ბრიუსელის უმწიფარ პოლიტიკას, ბავშვური ქცევა აქვთ. გინდა ბრიუსელი, გინდ ევროკავშირის ელჩი, როგორც ისინი იქცევიან. ხან თვალებს არ ვუჯერებ რასთან გვაქვს საქმე. ამ ხალხს აქვს პრეტენზია, რომ გლობალური მოთამაშე იყვნენ? ამიტომ არიან ჩახსნილები სერიოზული საერთაშორისო საუბრებიდან. იხვეწებიან, რომ უკრაინა-რუსეთის ომთან დაკავშირებით ჩართონ მოლაპარაკებებში. არც რუსეთს და არც ამერიკას არ აინტერესებს მათი მონაწილეობით საუბარი. ამ უმწიფრობით დამართეს საკუთარ თავს ის, რაც დამართეს“,- აღნიშნა პაპუაშვილმა.
ინფორმაციისთვის, ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა ევროპული საბჭოს სამიტამდე ჟურნალისტებს განუცხადა, რომ არ გგონია, რომ ევროპული საბჭოს სამიტზე საქართველოს ან შავი ზღვის საკითხებზე სიღრმისეული დისკუსიები ექნებათ, თუმცა უსაფრთხოების კონტექსტში ეს თემები წამოიჭრება.
ამასთან, ევროკომისიის მიერ გამოქვეყნებული სიის მიხედვით, საქართველოს ხელისუფლება ევროკავშირის გაფართოების ფორუმზე წარმოდგენილი არ იქნება.
