გრან-პრი და ორი მთავრი პრიზი – ქუთაისის თოჯინების თეატრის სპექტაკლის “მახინჯი იხვის ჭუკი” წარმატება

ქუთაისის თოჯინების თეატრის სპექტაკლი “მახინჯი იხვის ჭუკი” ბათუმის საერთაშორისო თოჯინების თეატრალური ფესტივალის გამარჯვებულია. სპექტაკლმა გრან-პრი მოიპოვა. ამავე სპექტაკლის რეჟისორი ნინო მაღლაკელიძე საუკეთესო რეჟისორად, მსახიობი აბელ სოსელია კი საუკეთესო მამაკაც მსახიობად დასახელდა.

ჰანს კრისტიან ანდერსენის “მახინჯი იხვის ჭუკი” ქუთაისის თოჯინების თეატრში 2021 წელს დაიდგა.

“ვფიქრობ, საბავშვო თეატრმა მაყურებელს უაღრესად აქტუალური პრობლემის გადაჭრის მისეული ვერსია შესთავაზა არა მხოლოდ პატარებს, არამედ მათ მშობლებს. ” – წერდა თეარმცოდნე ლაშა ჩხარტიშვილი სპექტაკლის შესახებ.

ბათუმის საერთაშორისო თოჯინების თეატრალურ ფესტივალი საქართველოს კულტურის, სპორტისა და ახალგაზრდობის და აჭარის ავტონომიური რესპუბლიკის განათლების, კულტურისა და სპორტის სამინისტროების მხარდაჭერით, ბათუმის თოჯინებისა და მოზარდ მაყურებელთა პროფესიულმა სახელმწიფო თეატრმა, საქართველოს თოჯინების პროფესიული თეატრების გაერთიანებასთან ერთად, დააფუძნა, რომელიც წელს პირველად ჩატარდა. ფესტივალი 8 სექტემბერს გაიხსნა და 13 სექტემბერს დაჯილდოების ცერემონიით დაიხურა.

ღონისძიებას აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე, საქართველოს კულტურის, სპორტისა და ახალგაზრდობის მინისტრი თეა წულუკიანი, აჭარის ავტონომიური რესპუბლიკის განათლების, კულტურისა და სპორტის მინისტრი მაია ხაჯიშვილი, სახელმწიფო თეატრების სამხატვრო ხელმძღვანელები, სახელოვნებო უნივერსიტეტების რექტორები, თეატრმცოდნეები და მოწვეული სტუმრები ესწრებოდნენ. ფესტივალის დაჯილდოების ღონისძიებას უძღვებოდა ნიკა წულუკიძე.

გამარჯვებულები შვიდ ნომინაციაში გამოვლინდნენ:

1. საუკეთესო სპექტაკლი – „მახინჯი იხვის ჭუკი“;

2. საუკეთესო რეჟისურა – ნინო მაღლაკელიძე;

3. საუკეთესო სცენოგრაფია – ვახო ქორიძე;

4. საუკეთესო მუსიკალური გაფორმება – სანდრო ნიკოლაძე;

5. საუკეთესო მსახიობი ქალი – ირინა კუბანსკი;

6. საუკეთესო მსახიობი კაცი – აბელ სოსელია;

7. ქართული კრიტიკის პრიზი – „80 000 კილომეტრი წყალქვეშ“. კონკურსანტებს აფასებდა საერთაშორისო ჟიური პოლონეთიდან, თურქეთიდან და ყაზახეთიდან.

ფესტივალის პირველ წელს რვა საკონკურსო და ორი არასაკონკურსო ჩვენების ფარგლებში წარმოდგენილი იყო შვიდი თეატრის ათი სპექტაკლი. მომავალში ფესტივალი გაფართოვდება და მოიცავს როგორც საქართველოს, ისე სხვა ქვეყნების თეატრალურ დასებს.

გარდა სპექტაკლის ჩვენებისა, ფესტივალი მსახიობებს სთავაზობდა მასტერკლასების სერიას: სასცენო მეტყველების სავარჯიშოები; თოჯინების თეატრი – ტრადიციული თურქული ჩრდილების თეატრი – ყარაგეზი; თოჯინების თეატრის დღევანდელი მდგომარეობა აზიასა და ყაზახეთში; ჩვილებისთვის განკუთვნილი სპექტაკლების შექმნა.

ფესტივალის სამხატვრო ხელმძღვანელები არიან ნიკოლოზ საბაშვილი და ირაკლი კიკვაძე. დირექტორები – იმედა თავდგირიძე და კონსტანტინე ქარქაშაძე.

ფესტივალის ფინანსური მხარდამჭერები: საქართველოს კულტურის სპორტისა და ახალგაზრდობის სამინისტრო, აჭარის ავტონომიური რესპუბლიკის განათლების კულტურისა და სპორტის სამინისტრო, დეველოპერული კომპანია „ნექსთ გრუპი“ და ბაზის ბანკი.