გოგონას, რომელმაც ბებოს თმის გაყიდვაში დახმარება სთხოვა, რათა გემრიელი საჭმელი ეყიდათ, დაეხმარნენ – მის შესახებ ინფორმაციას სოციალურ ქსელში საქველმოქმედო ორგანიზაციის “Helping Hands” – ოფიციალური გვერდი ავრცელებს.
“ელენე სირაძე – გოგონა ხარაგაულიდან, რომელმაც ბებოს თმის გაყიდვაში დახმარება სთხოვა, იმისთვის რომ გემრიელი საჭმელები ეყიდა, დღეს გახარებული და ბედნიერია, რადგან მას ემიგრანტების თანადგომით შევუძინეთ ბევრი პროდუქტი, რისგანაც ელენეს და მის და-ძმას ბებო გემრიელ სადილებს დაუმზადებს.
როდესაც ელენეს ვიდეო გავრცელდა ინტერნეტ სივრცეში, თითქმის ყველა მეგობრის გვერდზე იყო გაზიარებული, თვალცრემლიანი, ლურჯთვალა ლამაზი გოგონა…
იმ რაიონში კურიერიც არ გვყავს, მაგრამ დამიკავშირდა ერთი ღვთისნიერი ახალგაზრდა, (რომელმაც არ ინება მისი ვინაობის გაჟღერება) და გულიანად გაგვაკეთებინა ეს კეთილი საქმე. უდიდესი მადლობა ლაშას .ეს არის დიდსულოვნების და ადამიანობის დიდი მაგალითი .
აქვე მინდა უდიდესი მადლობა გადავუხადო “ამერიკული საქართველოს” წევრებს, ქალბატონ ბელა ბორაშვილს და ჯგუფის ორგანიზატორებს, მათი ინიციატივით გადმოგვეცა თანხა, რაც დავუმატეთ Helping Hands – ის მიერ შეგროვებულ თანხას და გავეშურეთ ელენეს და მისი დედმამიშვილების გასახარებლად.
ეს კიდევ ერთი დიდი მაგალითი იმისა , რომ
ერთად ყველაფერს შევძლებთ!
აქვე მინდა გითხრათ რომ ელენეს ოჯახს ესაჭიროება ლოგინი, სადაც ბავშვების ცალკე დაწვენა მოხერხდეს. ამერიკული საქართველოს ორგანიზატორებისგანაც გვაქვს მხარდაჭერა და ვიწყებთ კამპანიას ამ საკითხთან დაკავშირებით და ვისაც გექნებათ სურვილი შემოგვიერთდით და ერთად შევუძინოთ ელენეს კომფორტული საწოლი, ელენე და მისი და-ძმა ტკბილად დაიძნებენ.” – წერს “Helping Hands” – ოფიციალური ფეისბუკ გვერდზე.
