აშშ-ის ნიუ იორკის შტატის გენერალურმა პროკურორმა დათჩესის ოლქში მცხოვრებ 40 წლის ჯოშუა სიგინს ბრალი წარუდგინა და ის საკუთარი სახლის სარდაფში ზვიგენების უკანონოდ დატყვევებისა და მათი გაყიდვის განზრახვაში დაადანაშაულა. სასამართლომ მამაკაცს 5 ათასი აშშ დოლარის ოდენობის ჯარიმა დააკისრა და პირობითი მსჯავრით გაათავისუფლა.
ჯოშუა სიგინმა სამართალდამცველთა ყურადღება პირველად 2017 წლის ივლისში მიიპყრო, როცა ჯორჯიის შტატში მართვის მოწმობის გარეშე გადაადგილდებოდა. ავტომობილის დათვალიერებისას პოლიციამ საბარგულში განთავსებულ ავზში პატარა ზომის ხუთი ზვიგენი აღმოაჩინა, რომლებიც მამაკაცს ნიუ იორკში გადაჰყავდა. მოგვიანებით, მისი სახლის ჩრეკისას სარდაფში მოწყობილ აუზში ქვიშის ზვიგენების სახელით ცნობილ კიდევ შვიდ ინდივიდს მიაკვლიეს, რომელთა სათანადო ნებართვის გარეშე დატყვევებაც ნიუ იორკში კანონით იკრძალება.
პოლიცია ბრალდებულის სახლში ლეოპარდისებრი და ჩაქუჩა ზვიგენების სამ ლეშსა და გადაშენების საფრთხის წინაშე მყოფი ხერხთევზას დინგსაც გადააწყდა. სიგინმა აღიარა, რომ საკუთარი ბიზნესი, სახელწოდებით Aquatic Apex Life ჰქონდა, რომლის ფარგლებშიც წყლის ბინადრებით ვაჭრობდა. მათ შორის იყვნენ ზემოხსენებული ქვიშის ზვიგენებიც, რომელთა გაყიდვასაც სპეციალური საიტის მეშვეობით ის ჯერ კიდევ 2017 წლის 29 ივნისიდან ცდილობდა. ბიოლოგებმა ისინი ჯერ ქალაქ რივერჰედში მდებარე ლონგ აილენდის აკვარიუმში გადაიყვანეს, შემდეგ კი კონი აილენდში განლაგებულ ამავე სახის დაწესებულებაში განათავსეს.
ნიუ იორკის შტატის გენერალური პროკურორის მიერ გამოქვეყნებული ოფიციალური განცხადების თანახმად, სახელმწიფო კანონით დაცული ცხოველებით ვაჭრობას არ დაუშვებს. მისი თქმით, პასუხისგებაში მიეცემა ყველა ის პირი, რომელიც მსგავს დანაშაულს ჩაიდენს.
POPX.GE
