26 წლის ლანა ლატარიას გარდაცვალება უმძიმესი ტრაგედიაა. სოციალურ ქსელში უამრავი ადამიანი ემშვიდობება სიცოცხლით სავსე ლანას, რომელიც მეუღლესთან და ორ ულამაზეს გოგონასთან ერთად აჭარაში ცხოვრობდა. შვილის გარდაცვალების შემზარავი ამბავი მისმა მშობლებმა უცხოეთში გაიგეს, ლანას დედა, ქრისტინე კვარაცხელია ემიგრაციაში იყო და იქიდან თავზარდაცემული ბრუნდება, ემოციური სტატუსი გამოაქვეყნა სოციალურ ქსელში მისმა მამამ, უკრაინაში მებრძოლმა ზაალ ლატარიამ.
“ვაიმე შვილო, მოვდივარ მამა, შენთან ერთად უნდა მოვკვდე, შვილი აღარა მყავს” – წერს ზაალ ლატარია.
მისი თანამებრძოლები სთხოვენ საქართველოს ხელისუფლებას, რომ შვილმკვდარი მამა უპრობლემოდ შემოუშვან: “საქართველოს შეიარაღებული ძალების ვეტერანს, დამოუკიდებელი საქართველოს ისტორიაში ყველა ომის მონაწილეს, ამჟამად კი უკრაინაში მებრძოლ ზაალ ლატარიას გარდაეცვალა ქალიშვილი ლანა ლატარია ვუსამძიმრებთ ზაალს და მის ოჯახს ამ უდიდეს ტრაგედიას. იმედია, რომ საქართველოში დაბრუნებისას, ზაალის მიმართ ადგილი არ ექნება არანაირ პროვოკაციას და შვილმკვდარი მამა უპრობლემოდ გადმოკვეთს საზღვარს, რათა დაიტიროს საკუთარი შვილი “.
არსებული ინფორმაციით, 26 წლის ლანა ლატარია ღამით მოულოდნელად შეუძლოდ გახდა, რის შემდეგ ქობულეთში, კლინიკაში გადაიყვანეს, თუმცა მისი გადარჩენა ექიმებმა ვეღარ შეძლეს.
კიდევ ერთი მისი ახლობელი გვეუბნება, რომ სეფსისი სწორედ ნაყოფის მოშორებით იყო გამოწვეული:
“სხვადასხვა ვერსია გავრცელდა გუშინ, როცა ეს საშინელი ამბავი გავიგეთ. მერე ასე მითხრეს, რომ ლანა ორსულად იყო, ორი დღე სიცხე ქონია, ეტყობა მოშორდა ნაყოფი, ცუდად გამხდარა, რომ გადაიყვანეს კლინიკაში, ოპერაცია გაუკეთებიათ, განვითარდა სეფსისი და ამით გარდაიცვალაო, ძალიან განვიცდი ამ ამბავს. წლებია ლანას ვიცნობ, საუკეთესო ადამიანი იყო. ზუგდიდში მას უამრავი ადამიანი იცნობდა, გამორჩეული გოგონა იყო, გლოვაა მის მშობლიურ კუთხეში, სადაც გაიზარდა ლანა. მერე გათხოვდა, ქობულეთში იყო გათხოვილი, ჰქონდა არაჩვეულებრივი ოჯახი. დედამისი სამუშაოდ საზღვარგარეთ იყო წასული და წუხელ ჩამოფრინდა. ვუსამძიმრებ მის მშობლებს, ძმას, ლევანს, მის მეუღლეს და ახლობლებს ამ დიდ ტრაგედიას.”
ემოციური სტატუსი დაწერა სოციალურ ქსელში ჯაბა თოლორდავამ, რომელიც კარგად იცნობდა ლანას: ”მხრებზე შემჯდარი რომ დამყავდა, მე რომ სტუდენტი ვიყავი, ლანა იყო 2 წლის, მისი ძმა 4 წლის, ჩემ გვერდით ცხოვრობდნენ წლები და კისრით ვატარებდი. სულ მე მიტოვებდნენ ხოლმე და სასწაული სიყვარული მქონდა. მერე გაიზარდა, ულამაზესი მოცეკვავე გოგო დადგა, ზუგდიდში ყველა იცნობდა ლანას, მისი სილამაზით და წესიერებით, მერე ბათუმში შექმნა ულამაზესი ოჯახი, ეყოლა ორი შვილი, ულამაზესი გოგოები და ამ დილით უცებ გარდაიცვალა.
ნეტა ეს არ გამეგო. ლანა ჩემი იმედიანი, ჩემი პატარა დაიკო, რომელმაც ჩემი ამბავი რაც გაიგო მას მერე ყველანაირად რომ გვერდით მედგა ისეთი ლანა, ჩემთვის ბავშვი ხარ, ისევ ის კისრით რომ დამყავდი, ორმაგად მეწვის სული და გული შორს რომ ვარ. საცოდავი შენი დედ მამა, შენი მეუღლე, შენი ძმა, შენი ოჯახი. სასწაული გოგო იყო ლანა, სასწაული ყველას რომ უყვარდა, ერთი ნახვა საკმარისი იყო ლანა რომ შეგყვარებოდა. ახლა ამას მე უნდა ვწერდე სრულიად ჯანმრთელი, ყველას საიმედო ლანა რომ არ არის ამ სამყაროში. მიყვარხარ უსასრულოდ, მიყვარხარ ჩემთვის ის პატარა ლანა ხარ რომელიც კისერზე შემჯდარი დამყავდა ბავშვობაში. გული და სული მეწვის ლანა გული და სული მეწვის ჩემი სიცოცხლით სავსე გოგო ჩემი საიმედო პატარა დაიკო. მიყვარხარ, მუდამ ჩემ გულში იქნები ოდესმე შევხვდებით”.
ლანა ლატარია ივნისში გახდა 26 წლის, ძალიან ბედნიერი იყო თავის ოჯახთან ერთად. “12 წელი ქართული ცეკვა ჩემი ყოველდღიურობა იყო…და დღესაც, თითოეული სიმი, გასმა და მოძრაობა პირდაპირ სულამდე აღწევს.ეს ის გრძნობაა, რომელსაც დრო ვერასოდეს მავიწყებს. და მჯერა ჩემი გოგოებიც ერთ დღეს დიდ სცენაზე, ფილარმონიის შუქებში, გააგრძელებენ დედიკოს გზას” – წერდა ცოტა ხნის წინ ის სოციალურ ქსელში.
ვუსამძიმრებთ ლანას ოჯახის წევრებს ამ დიდი ტრაგედიის გამო.
ambebi.ge
