არ გამოვრიცხავ, ქვეყნის სამჯერ ჩაბნელება რუსეთის მხრიდან შანტაჟი იყოს და შეიძლება კონკრეტული პოლიტიკური მოთხოვნების შესრულებას უკავშირდებოდეს, რაც ხელისუფლებისთვის ძნელად ასახსნელია საზოგადოებისთვის. ვფიქრობ, ეს მოთხოვნები უფრო ოკუპირებულ რეგიონებს უნდა ეხებოდეს, – ამის შესახებ ანალიტიკოსმა ლელა ჯეჯელავამ გადაცემა „დღის ნიუსრუმში“ განაცხადა, რითაც ქვეყნის მასშტაბით ელექტროენერგიის გათიშვას გამოეხმაურა.
მისივე თქმით, მომხდარი ფაქტები ადასტურებს, რომ პრობლემა იმაზე სერიოზულია, ვიდრე „ერთი უხეირო ხელმძღვანელი და პასუხისმგებელი პირი“.
„ყველაზე მეტად ის მაწუხებს, რომ პირველი ორი ჩაბნელების შემდეგ ჩვენ ვერ მივიღეთ არგუმენტირებული პასუხი, თუ რა იყო მიზეზი, გარდა იმისა, რომ კონკრეტული ჩინოვნიკი გათავისუფლდა, რომელიც პასუხისმგებელი იყო ამ გამანაწილებელ სისტემაზე. აღმოჩნდა, რომ პერსონამდე არ დადის ეს საქმე, სერიოზული პრობლემაა, ვიდრე ერთი უხეირო ხელმძღვანელი და პასუხისმგებელი პირი.
ბუნდოვანება შემოიტანა იმანაც, რომ სემეკის წევრმა, გიორგი ფანგანმა „ფეისბუქზე“ დაწერა, რომ სატესტო რეჟიმი იყო „ენგურჰესზე“ და ამან გამოიწვია ეს ყველაფერი, შემდეგ კი აიღო პოსტი.
ხელისუფლების „სტოიკური“ დუმილია, არ აქვთ არგუმენტირებული პასუხი, არც ცდილობენ საზოგადოებაში უსაფუძვლო ვერსიები არ გავრცელდეს, რომელიც პანიკას დათესავს და ნეგატიურ განწყობას შექმნის.
ეჭვს მიჩენს, რომ არის ისეთი რამ, რაც ძალიან კრძალვის საუბარს, საზოგადოებისთვის განმარტების მიცემას. არ გამოვრიცხავ შანტაჟი იყოს ქვეყნის სამჯერ ჩაბნელება, შეიძლება უკავშირდებოდეს კონკრეტული მოთხოვნების შესრულებას, პოლიტიკურისას, რაც ხელისუფლებისთვის ძნელად ასახსნელია საზოგადოებისთვის. ვფიქრობ, უფრო ოკუპირებულ რეგიონებთან“,- აღნიშნა ჯეჯელავამ.
