კარდიოლოგი ნანა გეგეჭკორი ვაქცინაციის შესახებ ალერგოლოგ ბიძინა კულუმბეგოვის პოსტს ეხმაურება და საზოგადოებას უზიარებს როგორც პირად გამოცდილებას, ასევე ამერიკულ გაიდლაინს:
“ხშირად მეკითხებიან, კოვიდ გადატანილზე ერთი თუ ორი დოზა ვაქცინის?
ამერიკული გაიდლაინების მიხედვით ნებისმიერი, ვიმეორებ ნებისმიერი პირი ვაქცინირებულად ითვლება Pfizer-ის და Moderna-ს გამოყენების შემთხვევაში ორივე დოზიდან ორი კვირის გასვლის შემდეგ და J&J-ს გამოყენების შემთხვევაში ერთი დოზიდან ორი კვირის გასვლის შემდეგ.
სხვა შემთხვევაში ვაქცინირების დამადასტურებელ დოკუმენტს ვერ მიიღებ.
ეგრეთ წოდებული QR კოდიც სწორედ ორივე დოზით ვაქცინირებიდან მე-15 დღეს ხდება ხელმისაწვდომი.
ევროპული ქვეყნების პრაქტიკა ამ მხრივ განსხვავებულია.
თვალსაჩინოებისთვის გაგიზიარებთ ჩემს პირად მაგალითს.
როგორც ქვემოთ ატვირთული ფოტოებიდან შეგიძლიათ ნახოთ 23 ივნისს ჩატარებული ტესტის თანახმად, ჯერ კიდევ აღმენიშნებოდა კოვიდ სპეციფიური IgG და IgM ანტისხეულები.
მათ შორის IgG-ს ტიტრი ჩანს რომ საკმაოდ მაღალია (დადებითობის ზღვარი ამ ერთეულებში <9). პირველი დოზით ავიცერი 30 ივნისს და მეორე დოზით 21 ივლისს.
ვაქცინაციის პასპორტი ჩემთვის ხელმისაწვდომი გახდა მეორე დოზიდან მე-15 დღეს.
როგორც ხედავთ ესსაა სულ რამდენიმე დღის წინანდელი ამბავი. ამ წესებით აიცრა უკვე ორი ასეული მილიონი ადამიანი ამერიკაში.
ვინც ინგლისური იცის, ქვემოთ დავურთე ამონარიდი პროფესიონალური ამერიკული პლატფორმა UpTodate-დან კოვიდგადატანილების ვაქცინაციის წესების თაობაზე.
როგორც ამ წესებიდან ჩანს, კოვიდ-გადატანილს შეუძლია აიცრას დაავადების მწვავე ფაზის ჩამთავრების და იზოლაციის ვადის გასვლისთანავე.
იგივე ეხებათ ვაქცინის პირველი დოზის შემდგომ დაინფიცირებულებსაც.
ისინიც იცრებიან დაავადების მწვავე ფაზის ჩამთავრების და იზოლაციის ვადის გასვლისთანავე.
ჯამში ეს პერიოდი ზოგჯერ ერთ თვეზე ნაკლებ დროსაც მოიცავს. იზოლაცია ამერიკული წესებით მთავრდება პირველი სიმპტომების ან პოზიტიური ტესტიდან 10 დღის გასვლის შემდგომ, ბოლო 72 საათი უნდა იყოს უსიცხო.
Bidzina Kulumbekov – ვიცი შენც ბევრი კითხვა შემოგივიდა ამ საკითხზე და აგერ ამერიკული გაიდლაინიც და ჩემი პირადი მაგალითიც” – წერს ექიმი ნანა გეგეჭკორი.
