ბაკურიანში, ფრისტაილის, სნოუბორდის და ფრისკის მსოფლიო ჩემპიონატი ოფიციალურად იმართება. საქართველო ასეთი მაღალი დონის ჩემპიონატს პირველად მასპინძლობს. „ბაკურიანი 2023“-ში 42 ქვეყნის 700-მდე სპორტსმენი მონაწილეობს, აქედან საქართველოს სახელით ასპარეზობს ექვსი სპორტსმენი.
ერთ-ერთი ქართველი სპორტსმენი, დავით თედიაშვილი ბაკურიანში მსოფლიო ჩემპიონატის ფინალურ ეტაპზე გადავიდა. დავითი უკვე დიდიხანია სპორტითაა დაკავებული, ის სამი წლიდან დგას თხილამურებზე.
მასთან ინტერვიუ ტელეკომპანია “ბორჯომმა” ჩაწერა:
„პირველად, საერთაშორისო ტურნირზე 2015 წელს მსოფლიო უნივერსიადაზე ვიასპარეზე ესპანეთში. ამის შემდეგ იყო ჩეხეთი 2016 წელს და 2-ჯერ მეორე ადგილი ფისზე, კურორტი რეჯისე. 2017 წელს ყაზახეთში მსოფლიო უნივერსიადაზე მე-7 ადგილი დავიკავე. შემდეგ, პირველი ადგილი ჩეხეთისა და სლოვაკეთის პირველობაზე. ასევე, 2017 წელს ესპანეთში მსოფლიო ჩემპიონატზე ვიასპარეზე. 2018 წელს ტრავმამ ერთი წელი გამომატოვებინა, შემდეგ პანდემია დაიწყო და მთელი ეს პერიოდი პასიურად ვიყავი. 2021 წლიდან კი განვაახლე სპორტული კარიერა. ძირითადად, პირველი და მეორე ადგილები დავიკავე ჩეხეთში, შვეიცარიაში, ავსტრიაში გამართულ საერთაშორისო შეჯიბრებებში“ – ამბობს დავით თედიაშვილი.
