“თაობათა დიალოგი” არც განიხილავს გვანცა თოთაძის გენდერულ საბჭოში შეცვლის საკითხს და მას მხარდაჭერას უცხადებს” – RICDOG ქუთაისის საკრებულოს დეპუტატის მიერ საკრებულოს სხდომაზე გენდერული თანასწორობის საბჭოდან გვანცა თოთაძის გაწვევასთან დაკავშირებით გაკეთებულ განცხადებას ეხმაურება.
“მეგა ტვ”განცხადებას უცვლელად გთავაზობთ:
“სამეცნიერო-ინტელექტუალური კლუბი “თაობათა დიალოგი” (RICDOG) ეხმიანება დღეს, 27 ნოემბერს, ქუთაისის მუნიციპალიტეტის საკრებულოს სხდომაზე, ორგანიზაციის საპატიო გენერალური მდივნისა და კომუნიკაციების მენეჯერის, გვანცა თოთაძის მიმართ გაკეთებულ განცხადებას.
კერძოდ, სამეცნიერო-ინტელექტუალური კლუბი “თაობათა დიალოგი” გამოხატავს გაკვირვებას საკრებულოს სხდომაზე განხილული თემის მიმართ და აღნიშნულთან გვანცა თოთაძის დაკავშირების საკითხს.
მოგეხსენებათ, გვანცა თოთაძე ქუთაისის მუნიციპალიტეტის გენდერული თანასწორობის საბჭოში წარმოადგენს სამეცნიერო-ინტელექტუალურ კლუბ “თაობათა დიალოგს” და იგი ორგანიზაციის სახელით მონაწილეობს აღნიშნული საბჭოს მუშაობაში.
ორგანიზაციას გენდერული თანასწორობის საბჭოდან და საბჭოს მუშაობის განმავლობაში არასდროს არ მიუღია, შესაბამისად ამ ეტაპზეც არ აქვს რაიმე სახის ინფორმაცია, გვანცა თოთაძის, როგორც საბჭოს წევრის რაიმე სახის დარღვევაზე. პირიქით, ორგანიზაცია მის აქტიურობას საბჭოს მუშაობის ფარგლებში მაღალ დონეზე აფასებს.
მეტიც, სამეცნიერო-ინტელექტუალური კლუბი “თაობათა დიალოგი” არც განიხილავს გვანცა თოთაძის გენდერულ საბჭოში შეცვლის საკითხს.
რაც შეეხება გვანცა თოთაძის მოქალაქეობრივ პოზიციას საკრებულოს ზოგიერთი წევრის მოღვაწეობასთან დაკავშირებით, მას აღნიშნული მოსაზრების გამოთქმის კონსტიტუციური უფლება გააჩნია და RICDOG-ი არც და ვერც დაუშლის მას ჰქონდეს მოქალაქეობრივი აქტიურობა.
მითუმეტეს, როდესაც აღნიშნული არ ეწინააღმდეგება ორგანიზაციის მიერ გაცხადებულ ეთიკის კოდექსს.
სამეცნიერო-ინტელექტუალური კლუბის “თაობათა დიალოგი” ყველა წევრი დიდ პატივისცემას გამოხატავს გვანცა თოთაძის, როგორც ორგანიზაციის ერთ-ერთ წარმატებული ხელმძღვანელის მიმართ (გენერალური მდივანი 2014-2017 წლებში) და მას, ამ გაუგებარ სიტუაციაში, სრულ მხარდაჭერას უცხადებს.” – ნათქვამია განცხადებაში.
დღეს საკრებულოს სხდომაზე თბილისში ხატებით გამართული საპროტესტო აქციის ფაქტის დაგმობა და პოზიციის დაფიქსირება ქუთაისის საკრებულოს დეპუტატებს უმრავლესობის დეპუტატმა ალეკო ახალაძემ მოსთხოვა. ახალაძე სიტყვით საკრებულოს სხდომაზე გამოვიდა.
“მიმდინარე მოვლენებს გვერდი აუარეთ და საკრებულოს სხდომა ისე დაიწყეთ. მოგწონთ ხატებით გამოსვლა? ვალდებულები ხართ დააფიქსიროთ თქვენი აზრი. ნანა კოსტავას საკითხზე ჩირგვებში ჩაძვერით და ახლაც ჩირგვებში სხედხართ. ეს არის ერისა და ბერის შეცდომა. ისინი სოდომისტები და ხატმებრძოლები არიან და ეს არ უნდა მოვითმინოთ. ეს ურწმუნოება ჩვენს ოჯახებშიც შემობრუნდება,”-განაცხადა ახალაძემ.
ახალაძის თქმით, მომხდარი ფაქტი არც ერთმა არასამთავრობო ორგანიზაციამ არ დაგმო, რომლებიც ნანა კოსტავას საკითხზე აქტიურობდნენ, რაც მისთვის მიუღებელია. მათ შორის არც გენდერული საბჭოს წევრმა და სამოქალაქო აქტივისტმა გვანცა თოთაძემ, რომელიც ნანა კოსტავას საკრებულოს დატოვებისაკენ მოუწოდებდა.
ახალაძემ უმრავლესობის დეპუტატსა და გენდერული თანასწორობის საბჭოს თავმჯდომარეს ირაკლი შენგელიას მიმართა და უთხრა, რომ გენდერული საბჭოს წევრის გვანცა თოთაძის საბჭოში ყოფნის საკითხი კითხვის ნიშნის ქვეშ უნდა დაეყენებინა.
“ყველა ადამიანს უფლება აქვს, რომ მისი შეხედულებისამებრ გააკეთოს განცხადებები. ამის საშუალებას მათ კანონი ანიჭებს. შემოიტანეთ განცხადება გენდერულ საბჭოში და დებულების მიხედვით განვიხილავთ,”-განუცხადა შენგელიამ ალეკო ახალაძეს.
ალეკო ახალაძე ამბობს, რომ არ იცის მივა თუ არა გენდერული საბჭოს სხდომაზე. მისი თქმით, მან საკუთარი მოსაზრება დააფიქსირა, რაზეც სხდომაზე ირაკლი შენგელიას გამოხმაურება ზედმეტად მიიჩნია.
“გირჩის” აქტივისტებმა ივანიშვილის სახლთან ფოტოები მიიტანეს, რომლებზეც ივანიშვილი რელიგიური სიმბოლოებით იყო გამოსახული.
