თუ უნდათ ჩაერთონ ქალაქის მთავარი, 2023 ბიუჯეტის მიღების პროცესში, გააგრძელონ ჩვენთან ერთად მუშაობა ქალაქის საკეთილდღეოთ, თუ ურჩევნიათ დაუჭირონ მხარი თავიანთ მთავარსარდალ სააკაშვილს – ასე გამოეხმაურა ,,ქართული ოცნების” ფრაქციის თავმჯდომარე ქუთაისის საკრებულოში მარეხი ნიჟარაძე ,,,ერთიანი ნაციონალურის” დაანონსებულ ბოიკოტს.
,,ნაციონალური მოძრაობის დესტრუქცია და ბოიკოტი არახალია ჩვენთვის. საკრებულო გააგრძელებს მუშაობს, ჩვეულ რეჟიმში. ჩვენ გვაქვს ძალიან ბევრი საკეთებელი ქალაქისთვის და მოსახლეობისთვის, მათი კეთილდღეობისთვის. ეს არის მათი არჩევანი, რა ურჩევნიათ. უნდათ ჩაერთონ ქალაქის მთავარი, 2023 ბიუჯეტის მიღების პროცესში, გააგრძელონ ჩვენთან ერთად მუშაობა ქალაქის საკეთილდღეოთ, თუ ურჩევნიათ დაუჭირონ მხარი თავიანთ მთავარსარდალ სააკაშვილს. ასე რომ, ჩვენ ვაგრძელებთ მუშაობას საკრებულოში, არავითარ შემთხვევაში ხელი არ უნდა შეეშალოს ქალაქში დაგეგმილ ღონისძიებებს, ინფრასტრუქტურულ პროექტებს, სოციალურ საკითხებს, რომელიც ძალიან მნიშვნელოვანია ჩვენი მოსახლეობისთვის. კიდევ ვიმეორებ ბოიკოტი იქნება თუ დესტრუქცია ეს არის მათი არჩევანი.” – განაცხადა მარეხი ნიჟარაძემ.
მან ასევე შეაფასა საქართველოს მესამე პრეზიდენტის მიხეილ სააკაშვილის მდგომარეობა:
,,ჩემი სუბიექტური შეფასებით მესამე პრეზიდენტის მდგომარეობა შეიძლება იყოს მძიმე, შეიძლება არ იყოს მძიმე, შეიძლება ჰქონდეს სიმულაციასაც ადგილი.” – ამბობს მარეხი ნიჟარაძე.
ცნობისთვის, დღეს მერიის წინ ფრაქცია ერთიანი ნაციონალური მოძრაობის წევრებმა ქუთაისის მერიასთან ბრიფინგი გამართეს და განაცხადეს რომ ბოიკოტის რეჟიმში გადადის. ისინი უარს ამბობენ დაესწრონ ქუთაისის საკრებულოს სხდომებს, სანამ ქვეყნის მესამე პრეზიდენტს მიხეილ სააკაშვილს არ აღმოუჩენენ შესაბამის სამედიცინო დახმარებას.
