აშშ-ში ჩასული უკრაინის პრეზიდენტი ვოლოდიმირ ზელენსკი კონგრესში სიტყვით გამოვიდა.
“შინ კარგი ამბებით ვბრუნდები, პრეზიდენტმა ბაიდენმა გამოაცხადა უკრაინის სამხედრო დახმარების ახალი, დაახლოებით, 2 მილიარდი დოლარის ოდენობის ახალი პაკეტის შესახებ”, – განაცხადა უკრაინის პრეზიდენტმა, ვოლოდიმირ ზელენსკიმ ამერიკელ კოლეგასთან, ჯო ბაიდენთან შეხვედრის შემდეგ.
აშშ-ს პრეზიდენტმა განაცხადა სამხედრო დახმარების ახალი 1.85 მილიარდი დოლარის ღირებულების პაკეტის შესახებ.
„დღეს მე ვაცხადებ უკრაინის უსაფრთხოების დახმარების მორიგი ტრანშის შესახებ. 1.85 მილიარდი დოლარის ოდენობის პაკეტი მოიცავს როგორც უკრაინისთვის საჭირო აღჭურვილობის პირდაპირ ტრანსფერებს, ასევე კონტრაქტებს საბრძოლო მასალების მიწოდებისთვის, რომლებიც უკრაინას მომდევნო თვეებში დასჭირდება მისი არტილერიის, ტანკებისა და სარაკეტო სისტემებისთვის. მნიშვნელოვანია, რომ, ამ ახალი შესაძლებლობების გარდა, პაკეტი ასევე მოიცავს „პეტრიოტის“ ბატარიებს“, – განაცხადა ბაიდენმა.
ბაიდენის თქმით, რუსეთი ზამთარს „იარაღად იყენებს“.
„ყინავს და აშიმშილებს ხალხს, ერთმანეთისგან აცალკევებს მათ. ჩვენ ვმუშაობთ, რათა რუსეთს პასუხი ვაგებინოთ. მათ შორის იგულისხმება ძალისხმევა კონგრესში, რაც გაამარტივებს მართლმსაჯულების ძიებას უკრაინაში რუსული სამხედრო დანაშაულების გამო“, – აღნიშნა ბაიდენმა.
