ქუთაისის საფეხბურთო კლუბს” ტორპედო” კვლავ კახა ჩხეტიანი გაწვთნის. ამის შესახებ კლუბში პრესკონფერენცია გაიმართა. კახა ჩხეტიანმა მადლობა გადაუხადა გულშემატკივრებსა და კლუბის ხელმძღვანელობას. მან ხაზგასმით აღნიშნა რომ პოლიტიკური მიზნები მას არც აქვს და არც ქონია:
„ჩემთვის ბედნიერებაა ქუთაისის ტორპედოში დაბრუნება. მადლობა მინდა ჩვენს გულშემატკივრებს და მთელ ქალაქს გადავუხადო. მადლობა მინდა გადავუხადო კლუბის ხელმძღვანელობას , ასეთი დიდი ნდობისათვის. ეს ჩემთვის ორმაგი პასუხისმგებლობაა და შევეცდებით, რომ ის მიზნები, რაც კლუბს აქვს დასახული ჩემი აქ ყოფნის და მომდევნო პერიოდში დასაწყისი იყოს იმ დიდი წარმატების , რომლითაც ქუთაისის ტორპედო ყოველთვის ამაყობდა და ის ხალხი ვისაც ქუთაისის ტორპედო უყვარს ბედნიერები იყვნენ ყოველთვის.
ერთ საკითხს მინდა გავუსვა ხაზი . ბევრის საუბარი იყო პოლიტიკის თემაზე . მინდა თქვენც გითხრათ და ყველა იმ ადამიანს ვუთხრა , არასდროს ცხოვრებაში მე არანაირი პოლიტიკური მიზანი არ მქონია , არც კავშირი მქონია არასდროს . ის გადაწყვეტილება იყო მაშინდელი ტორპედოს მდგომარეობიდან გამომდინარე . ყველას კარგად მოგეხსენებათ თუ რა მდგომარეობა იყო მაშინ გუნდში. დაწმუნებული ვარ, რომ იმ წელს აუცილებლად გავარდებოდა გუნდი, რომ დავით კერესელიძე არ გამოჩენილიყო და ამიტომ , არც წარსულში ,არც ახლა და არც მომავალში პოლიტიკური, არც მიზანი მაქვს,არც განათლება გამაჩნია მაგის და საერთო არ მაინტერესებს ყველამ რომ იცოდეს .
უბრალოდ იყო რაღაც მითქმა-მოთქმები , რამაც ვფიქრობ გარკვეული როლი ითამაში ჩემი გუნდიდან წასვლაში . ამიტომ მინდა ყველას გითხრათ, რომ ამაზე საუბარი დამთავრებულია. ჩემი ერთადერთი მიზანია ქუთაისის ტორპედოსთან ერთად წარმატებებს მივაღწიო .”
შეგახსენებთ რომ ადგილობრივი თვითმართველობის არჩევნებში კახა ჩხეტიანი გიორგი გახარიას პროპორციული სიის მესამე ნომრად იყო წარდგენილი, თუმცა პარტიამ საკრებულოში პარტიული სიიდან მხოლოდ 2 დეპუტატის შეყვანა შეძლო.
არჩევნების დასრულების შემდეგ კლუბმა კახა ჩხეტიანი გაათავისუფლა, რასაც სპეკულაციები მოყვა.
ხელმძღვანელობა მისი გათავისუფლების ოფიციალურ მიზეზად „ტორპედოს ბოლოდროინდელ შედეგებს ასახელებდა.
„ქუთაისის „ტორპედოს“ მიერ ბოლო პერიოდში ნაჩვენები შედეგებისა და დღეის მდგომარეობით არსებული სატურნირო ვითარების გათვალისწინებით, კლუბის ხელმძღვანელობამ მიიღო გადაწყვეტილება, შეეწყვიტა თანამშრომლობა კახაბერ ჩხეტიანთან“, – ნათქვამია საფეხბურთო კლუბის მიერ პირველ ნოემბერს გავრცელებულ განცხადებაში.
