მარტში რუსეთი, ლოგისტიკური სირთულეების მიუხედავად, 2 მილიონ ტონაზე მეტი ხორბლის ექსპორტს შეძლებს. ამის შესახებ აგრარული ბაზრის კვლევის ინსტიტუტის (IKAR) გენერალურმა დირექტორმა, დიმიტრი რილკომ “ინტერფაქსს” განუცხადა.
„ეს იქნება იმაზე მეტი, ვიდრე ბევრი მოელოდა,” – ამბობს რილკო.
მისი თქმით, მოსალოდნელი მინიმალური გადაზიდვების ნაცვლად, ექსპორტი საკმაოდ მოწესრიგებულია და შავი ზღვის პორტები კარგად, თუმცა არასრული დატვირთვით მუშაობენ.
ამ ფონზე, რილკოს მონაცემებით, ხორბლის მსოფლიო ფასები ნელ-ნელა მცირდება. ამჟამად ხორბლის FOB Novorossiysk-ის ფასი ტონაზე 390 დოლარია, მაშინ, როცა ორიოდე კვირის წინ 460 დოლარამდეც იყო ასული. რილკოს შეფასებით, ეს ვარდნა გამოწვეულია იმით, რომ მიწოდება მიმდინარეობს. მსოფლიო ბაზარი უკვე საკმაოდ შეშინებულია და ახალი, გაწონასწორებული ფასების ძიებაშია.
მისი თქმით, მარტში რუსული მარცვლეულის ძირითადი შემსყიდველები ეგვიპტე და თურქეთი არიან. მარცვლეულის მიწოდება ამჟამად შესაძლებელია მხოლოდ იმ კვოტის ფარგლებში, რომელიც ძალაში შევიდა 15 თებერვალს. მისი მოცულობა (30 ივნისის მდგომარეობით) 11 მილიონი ტონაა, მათ შორის 8 მილიონი ტონა ხორბალია. კვოტა ევრაზიის ეკონომიკური კავშირის ქვეყნებში მარცვლეულის ექსპორტზე არ ვრცელდება. ამ მიმართულებით ექსპორტი 16 მარტიდან 30 ივნისის ჩათვლით აკრძალულია.
რუსეთის სოფლის მეურნეობის სამინისტრო, ფედერალური საბაჟო სამსახურის უახლეს მონაცემებზე დაყრდნობით, იტყობინება, რომ 2021 წლის 1-ლი ივლისიდან 2022 წლის 10 მარტამდე ექსპორტირებულია 28,1 მილიონი ტონა მარცვლეული, რაც წინა წელთან შედარებით, 30.3%-ით ნაკლებია. მათ შორის შემცირდა: ხორბლის ექსპორტი 30,9%-ით, 23 მლნ ტონამდე, ქერის – 34,7%-ით, 2,9 მლნ ტონამდე, სიმინდის კი 21,7%-ით, 1,8 მლნ ტონამდე.
Bpn.ge
