ლოპოტას ხეობაში კოპანია “ართანა ლოპოტამ” ჰესის მშენებლობისათვის მოსამზადებელი სამუშაოების დაწყება სცადა, თუმცა ადგილზე შეკრებილმა მოსახლეობამ კომპანიის წარმომადგენლებს ამის საშუალება არ მისცა. ადგილზე მობილიზებულია 50-მდე სამართალდამცევლი.
ქართულ-იტალიური კომპანიის წარმომადგენლებმა, მცირე რაოდენობის ტექნიკა და სამშენებლო მასალა ხეობაში დღეს შეიტანეს. ადგილობრივებთან კამათისა და დაპირისპირების შემდეგ კომპანიამ ხეობა დატოვა.
ადგილობრივების თქმით, ისინი ჰესის მშენებლობას არ დაუშვებენ, რადგან ისინი წყლის გარეშე დარჩებიან. მათივე თქმით, აღნიშნული მიწა ლაფანყურელების კუთვნილებაა და მას ვერავინ მიითვისებს.
კომპანიის წარმომადგენლების თქმით კი, მათ მშენებლობისთვის ოფიციალური ნებართვა აქვთ და ჰესის მშენებლობას ნებისმიერ შემთხვევაში დაიწყებენ.
ცნობისთვის, ლოპოტას ხეობაში პროექტის განხორციელებაზე კომპანიამ ნებართვა 2019 წელს მიიღო, თუმცა მშენებლობა ამ დრომდე შეჩერებულია.
ურეზერვუარო, მცირე ჰესის მშენებლობაზე 2020 წლის ოქტომბრამდე კომპანიას ჯამში 10 მლნ დოლარის ინვესტიცია უნდა განეხორციელებინა, შედეგად კი წლიურად 25 მლნ კვტ.სთ. ელექტროენერგია მიეღო.
ჰესის მშენებლობას ხეობაში, ადგილობრივი მოსახლეობა ეწინააღმდეგება. მათ სოფელ ლაფანყურთან, სადღეღამისო მორიგეობის პუნქტი აქვთ მოწყობილი.
