ქუთაისის საერთაშორისო უნივერსიტეტი ახალგაზრდა ფიზიკოსთა 34-ე საერთაშორისო ტურნირს მასპინძლობს. ტურნირის საზეიმო გახსნის ცერემონია ლადო მესხიშვილის სახელობის სახელმწიფო დრამატულ თეატრში შედგა. მოგვინებით გუნდები ასპარეზობას უკვე უნივერსიტეტის კამპუსში გააგრძელებენ. რამდენიმე დღის მანძილზე მათ შესაძლებლობა ექნებათ,საკუთარი უნარები ფიზიკის ღია ტურნირში გამოცადონ. ტურნირი 8 ივლისიდან 14 ივლისამდე გაგრძელდება.
ახალგაზრდა ფიზიკოსთა საერთაშორისო ტურნირი, რომელსაც ხშირად „ფიზიკის მსოფლიო თასს“ უწოდებენ, ყოვეწლიურად ტარდება და მნიშვნელოვან ინტელექტუალურ კონკურსს წარმოადგენს საშუალო სკოლის მოსწავლეებისათვის.ტურნირის მიზანია, წარმოაჩინოს მონაწილეთა უნარები – წარმატებით გადაჭრან ფიზიკაში დასმული პრობლემები, წარმოადგინონ ჩატარებული კვლევების შედეგები და შეძლონ მათი დაცვა მოწინააღმდეგე გუნდებთან გამართულ სამეცნიერო დისკუსიებში. ტურნირის მრავალწლიან ისტორიაში საქართველოს ნაკრებებს სხვადასხვა წელს მოპოვებული აქვთ გუნდური ბრინჯაოს – 8, ვერცხლის – 3 და ოქროს 1 მედალი.
