თამარ ჟვანია არის სიმბოლო იმ კრიზისის, რომელიც მივიღეთ არჩევნების შემდეგ – არ მჯერა, რომ დამოუკიდებლად მიიღებდა გადაწყვეტილებას გადადგომაზე, მას კონსულტაციები ექნებოდა “ქართულ ოცნებასთან”,- ამის შესახებ ფრაქცია “შარლ მიშელის რეფორმების ჯგუფის” თავმჯდომარე ხათუნა სამნიძემ ფანაცხადა.
„ჩემთვის მოსალოდნელი იყო ეს გადადგომა, იმდენად დისკრედიტირებული იყო წინა პროცესი არჩევნების, რომელიც ქალბატონი ჟვანიას მეთაურობით ჩატარდა, რომ „ქართული ოცნება“ ყველაფერს გააკეთებდა, შემდეგ არჩევნებზე ეს პრობლემა მოეხსნა. ამიტომ, ლოგიკურია ეს ამბავი და დარწმუნებული ვარ, ქალბატონ ჟვანიას გადაიყვანენ სხვა საპატიო ადგილზე“, – გირჩის დეპუტატი იაგო ხვიჩია.
საზოგადოებრივი და საერთაშორისო თანამეგობრობის წნეხის გათვალისწინებით, თამარ ჟვანია განწირული იყო ამ ნაბიჯისთვის და ის უნდა გადამდგარიყო, – „ევროპული საქართველოს“ წევრი ლაშა დამენია.
იმ საკითხების გადასაფარად, რაც დღეს სასამართლო სისტემაში მიმდინარეობს, “ქართულმა ოცნებამ” სავარაუდოდ, იძულების ფორმით გადააყენა თამარ ჟვანია და ამით ცდილობენ სახის შენარჩუნებას,- პარტია „საქართველოსთვის“ წევრი, დეპუტატი გიორგი ხოჯევანიშვილი.
საბოლოოდ, ყველაფერს ფარდა აეხადა და რეალურად გამოვლინდა, რომ თამარ ჟვანიას მიმართ გაკეთებულ ბრალდებებს არანაირი საფუძველი და დასაყრდენი არ გააჩნდა. ესაა მისი გადაწყვეტილება, რასაც პატივისცემა სჭირდება. – პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძე.
„თამარ ჟვანიას გადაწყვეტილება არის სწორი. ისეთი არჩევნების შემდეგ, რაც ვნახეთ, ეს ნაბიჯი მას უფრო ადრეც უნდა გადაედგა, მაგრამ ჩვენ ახლა უნდა ვიზრუნოთ იმაზე, რომ მართლაც ისეთი თავმჯდომარე იყოს არჩეული, რომელიც შეძლებს, თვითმმართველობის არჩევნების ისე ჩატარებას, რომ წლევანდელმა არჩევნებმა რეალური შედეგი მოგვცეს და ადამიანების ხმის მიტაცება არ მოხდეს – ბადრი ჯაფარიძე
თამარ ჟვანიას გადადგომით არაფერი შეიცვლება, ამით საარჩევნო გარემო არც გაჯანსაღდება და არც გაუარესდება. ერთი წევრის გადადგომით კოლეგიურ ორგანოში მდგომარეობა არ იცვლება. სისტემური ცვლილებებით უნდა მივიდეთ იქამდე, რომ ნდობა იყოს მაღალი. ერთი წევრის, თამარ ჟვანიას გადადგომით უბრალოდ ახალი თავმჯდომარე ეყოლება ცენტრალურ საარჩევნო კომისიას. ეს ნაბიჯი იქნება კარგი იმისთვის, რომ ნდობა საარჩევნო ადმინისტრაციის მიმართ, ახალი თავმჯდომარის დანიშვნით, უფრო მეტად გაიზარდოს. – საქართველოს ახალგაზრდა იურისტთა ასოციაციის თავმჯდომარე ნიკა სიმონიშვილი.
ადამიანურად მესმის მისი გადაწყვეტილება, რადგან ამ თვეების განმავლობაში დაუმსახურებელი შეურაცხყოფის და წნეხის ქვეშ იყო. დაუმსახურებელი იყო იმიტომ, რომ ყველა საერთაშორისო ორგანიზაციამ, ვისი სპეციალობაცაა არჩევნების შედეგების შესწავლა, დაადასტურა, რომ სერიოზული დარღვევები არ ყოფილა. იყო ხარვეზები, მაგრამ დარღვევები არ ყოფილა – პარლამენტის ვიცე-სპიკერი დავით სერგეენკო.
„თამარ ჟვანიას ჩამოშორების გარეშე, ოქტომბრის არჩევნებს მის ჩატარებამდევე ექნებოდა ლეგიტიმაციის კრიზისი. რამდენადაც თამარ ჟვანია დაკავშირებულია 2018 და 2020 წლის არჩევნების მანიპულაციასთან. მას არ აქვს სამოქალაქო სექტორისა და საზოგადოების ნდობა. ახლა მთავარია, რომ ჩვენ არ მივიღოთ ახალი თამარ ჟვანია, ეს ჩვენ, ოპოზიციამ და საზოგადოებამ ჩვენს ხელთ არსებული ყველა ბერკეტით უნდა დავაზღვიოთ“, – აცხადებს „ნაციონალური მოძრაობის“ წევრის გიორგი ხვედელიანი.
„რა თქმა უნდა, ეს გარკვეულწილად არის იმ ზეწოლის შედეგი, რომელიც საზოგადოებისა და საერთაშორისო თანამეგობრობის მხრიდან იყო, მაგრამ თამარ ჟვანიას ხომ არავინ დასჯის, ეს არის მნიშვნელოვანი, ამიტომ, იპოვნიან მეორე თამარ ჟვანიას. ხელისუფლება რომ აღიარებდეს გაყალბებულ არჩევნებს და სჯიდეს თამარ ჟვანიას, რა თქმა უნდა, ის ვერ იპოვის მეორე შემსრულებელს, რომელიც გააყალბებს ადგილობრივი თვითმმართველობის არჩევნებს. მაგრამ, როდესაც თამარ ჟვანიამ უზარმაზარი შემოსავალი მიიღო ამ წლების განმავლობაში და ახლა ისე მიდის, რომ ხელისუფლება ჯერ კიდევ ამბობს, ოპოზიციამ ბოდიში მოუხადოსო, რა თქმა უნდა, ნებისმიერ შემთხვევაში, იპოვნიან სხვა ადამიანს, რომელიც ისევე შეასრულებს ივანიშვილისა და კობახიძის დავალებას გაყალბებაზე, როგორც ასრულებდა ჟვანია. – „ერთიანი საქართველოს“ ლიდერმა ნინო ბურჯანაძე.
ცნობისთვის, ცენტრალური საარჩევნო კომისიის თავმჯდომარე თამარ ჟვანია თანამდებობიდან გადადგა. მის მოვალეობას დროებით გიორგი შარაბიძე შეასრულებს.
