,,დაახლოებით 1 კვირის წინ ხურვალეთში და ორჭოსანი-ავტობანის მიმდებარე ტერიტორიაზე აღმოვაჩინეთ რუსების რადიოლოკაციურ-სადაზვერვო აქტივობებისათვის მომზადებული ინფრასტრუქტურა, რომელიც ბოლო პერიოდში ოკუპანტმა მოაწყო ჩვენი ძალოვანი სტრუქტურების წარმომადგენლების სატელეფონო საუბრების გადასაჭერად.
დღეს კი ჩვენი პატრულირებისას სოფელ ბერშუეთში აღმოვაჩინეთ ახლად მოწყობილი ანალოგიური საგუშაგო “სპეც საპარკინგე” ადგილით, რომელიც ექსპერტების შეფასებით მზადდება რუსული რადიოდაზვერვის სპეც ავტომობილისთვის – “უაზ პატრიოტი ოკაპი”.
ამ საგუშაგოს ახლად მოწყობის ამბავი გადავამოწმეთ ადგილობრივ მოსახლეობასთან, რომელმაც დაგვიდასტურა, რომ ხსენებული საგუშაგო ცოტა ხნის წინ იქ არ იყო.
ასევე, დავაფიქსირეთ ახალი, ე.წ. სახანძრო ხნულები, რომლებსაც ოკუპანტები სინამდვილეში ავლებენ ე.წ. ” საზღვრის ” დასაფიქსირებლად.
გაგიკვირდებათ და დღესვე ვიპოვეთ ახალი რადიოლოკაციური ანძა, რომელიც იმ აქტივობათა ლოგიკურ ჯაჭვში ჯდება, რომლებზეც ჩვენ უკვე ბოლო კვირის განმავლობაში ვსაუბრობთ.
მოკლედ, ოკუპანტი სარგებლობს ჩვენი ხელისუფლების პასიურობით და არ ჩერდება.
მოსახლეობა კი ითხოვს ყურადღებას, დახმარებას, გვერდით დგომას.
არ ფიქრობთ ქალბატონო და ბატონო პარლამენტარებო, რომ დროა მიხედოთ თქვენგან სრულად მიტოვებულ მოსახლეობას?”-წერს დავით ქაცარავა სოციალურ ქსელში და იქვე, ფოტომასალასაც აქვეყნებს.
