დიდ ბრიტანეთში მდებარე ონკოლოგიური კვლევების ინსტიტუტში მოღვაწე მედიკოსებმა მსოფლიოს სხვადასხვა ქვეყნის სამეცნიერო დაწესებულებებში მომუშავე კოლეგებთან ერთად მკერდის კიბოს მქონე პაციენტებზე მკურნალობის ახალი მეთოდი გამოსცადეს, რამაც დადებითი შედეგი აჩვენა. ამის შესახებ მათი ნაშრომი გამოცემაში New England Journal of Medicine გამოქვეყნებულ ნაშრომშია წარმოდგენილი.
კვლევის ფარგლებში მეცნიერებმა Olaparib-ის სახელით ცნობილი მედიკამენტის გამოყენება გადაწყვიტეს, რომელიც ცდაში მონაწილე ქალებს ქიმიოთერაპიის კურსის გავლის შემდეგ ერთი წლის განმავლობაში დაუნიშნეს. პაციენტებს მკერდის მემკვიდრეობითი სიმსივნე ჰქონდათ. ეს უკანასკნელი გენების BRCA1 და BRCA2 მუტაციით არის გამოწვეული, ხშირად მწვავე ფორმით ვლინდება და განკურნების მიუხედავად ზოგჯერ ორგანიზმში ხელახლა იჩენს თავს. ამის საწინააღმდეგოდ, აღნიშნული პრეპარატი სიმსივნურ უჯრედებს დნმ-ის აღდგენის საშუალებას არ აძლევს, რასაც მოლეკულის PARP შესუსტების გზით ახერხებს. შედეგად, ისინი სიცოცხლისუნარიანობას კარგავენ და ნადგურდებიან.
სპეციალისტთა განცხადებით, ექსპერიმენტის დაწყებიდან ორწლინახევრის შემდეგ მიღებულმა შედეგებმა Olaparib-ის ეფექტიანობა დაამტკიცა. კერძოდ, მედიკამენტის წყალობით 921 ცდისპირიდან 85.9 პროცენტი სრულად განიკურნა. იმ პაციენტებში კი, რომლებმაც პრეპარატის ნაცვლად პლაცებო მიიღეს, ამ მაჩვენებელმა 77.1 პროცენტი შეადგინა. ეს იმას ნიშნავს, რომ კიბოს დაბრუნების რისკი საერთო ჯამში 42 პროცენტით შემცირდა. ასეთივე მონაცემები დაფიქსირდა ორგანიზმში მეტასტაზების გავრცელების მხრივაც. მსგავსი რამ არ მომხდარა პაციენტთა პირველი ნაწილის 87.5 პროცენტის, საკონტროლო ჯგუფიდან კი 80.4 პროცენტის შემთხვევაში.
მეცნიერებს ახალი მიგნება მნიშვნელოვან წინ გადადგმულ ნაბიჯად მიაჩნიათ. მათი აზრით, ის მკერდის კიბოთი დაავადებული უამრავი ქალის გადარჩენაში დაგვეხმარება და მათ ბოლომდე გამოჯანმრთელებას შეუწყობს ხელს.
