კლიმატის ცვლილებების კვირეულის ფარგლებში იმერეთის რეგიონის მედია საშუალებების წარმომადგენლებთან შეხვედრა გაიმართა. ღონისძიება “მწვანეთა მოძრაობა/დედამიწის მეგობრები საქართველოს” ორგანიზებით ჩატარდა. როგორც შეხვედრაზე აღინიშნა, კლიმატის ცვლილების პროცესი მსოფლიოს მასშტაბით სწრაფი ტემპით მიმდინარეობს. გარკვეული ცვლილებები აღინიშნება საქართველოშიც. გახშირდა ბუნებრივი კატასტროფები, იზრდება სხვადასხვა დაავადებისა და ეპიდემიის გავრცელების რისკები.
კლიმატის კვირეულის ფარგლებში სხვადასხვა ღონისძიებები, ფლეშმობები და ცნობიერების ასამაღლებელი კამპანიებია დაგეგმილი. მთავარი მიზანია, კლიმატის ცვლილების პროცესების შესამცირებლად მსოფლიოს საზოგადოება კიდევ ერთხელ გაერთიანდეს. როგორც შეხვედრაზე განაცხადეს ეკონომიკური განვითარების პარალელურად, მსოფლიო მთავრობები ვალდებულნი არიან შეამცირონ კლიმატის ცვლილების გამომწვევი მიზეზები. დაგეგმონ კლიმატის ცვლილებასთან ადაპტირების ღონისძიებები. მოიძიონ ფიანასური რესურსები, სათბური გაზების ემისიების შემცირებისა და კლიმატმედეგი განვითარებისთვის. შეხვედრა დისკუსიის ფორმატში მიმდინარეობდა. ადგილობრივი მედიის წარმომადგენლების თქმით მსგავსს ღონისძიებებში ჟურნალისტების ჩართულობა მნიშვნელოვანია.
მიმდინარე კლიმატის კვირეული ერთ-ერთი მასშტაბური აქტივობაა, რომელიც მთელს მსოფლიოში ხორციელდება. საქართველოში კვირეული 27 სექტემბერს დაიწყო და 4 ოქტომბრის ჩათვლით გაგრძელდება.
